भांगरभूंय | प्रतिनिधी
लेह, खबरां संस्था ः एनजीसी एनर्जी सेंटर लडाख हो प्रदेश देशांतल्या पयल्या जिओथर्मल ऊर्जा (Geothermal energy) प्रकल्पा खातीर वळखतले. हांगा दर्याथरा सावन 14 हजार फूट उंचायेचेर आनी जमनी पोंदा एक हजार फूट उंचायेचेर आशिल्ली 200 अंश सेल्सियस उश्णताय उदकाच्या रुपांत काडटले आनी तातूंतल्यान वीज तयार करतले. सुरवेक एक मेगावॅट वीज निर्मितीचें लक्ष्य थारायलां. ही वीज पुगा खोरे आनी लागसारच्या 110 गांवांक फुकट दितले. 1000 फूट सकयल खणपाचें काम 30 जुलय सावन सुरू जातलें.
खरें म्हणल्यार भारताच्या भूवैज्ञानिक सर्वेक्षणान देशांतले सुमार 340 उश्ण उदकाचे झरे वळखून घेतल्यात. तातूंतली पयलीं सुवात लडाखांतल्या पुगा देगणांत आसा. ताच्या 5 चौखण किमीच्या वाठारांत जिओथर्मल पायलट प्रकल्प (Geothermal pilot project) सुरू जाता. तो येस्सवी जाल्यार महाराष्ट्रांतल्या जळगांव, उत्तराखंडांतल्या तपोवन, हिमाचलांतल्या मणिकरण आनी छत्तीसगडांतल्या तट्टापानी हांगाच्या जमनी पोंदा आशिल्ल्या उश्ण उदकाच्या झऱ्यांतल्यान वीज तयार करपाक सुरवात जातली.
विशेश म्हळ्यार ह्या प्रकल्पांतल्यान भायर सरपी उर्जा पुरायपणान निवळ जातली. हाका लागून लडाखातल्या पर्यावरणाक हानी जावची ना. धर्तरेची निर्मिती आनी खनिजांचे किरणोत्सर्गी विघटनान जमनींत उश्णताय निर्माण जाता. धर्तरेवयल्या जिओथर्मल वाठारांनी हे उश्णतायेक लागून गरम उदक वा वाफ तयार जाता. ही वाफ टर्बायन चालीक लायता, जातूंतल्यान वीज तयार जाता. हे वाफेचो उपेग लडाख सारक्या थंड वाठारांनी बांदकाम आनी शेतवडी खातीरूय करूं येता. जीवाश्म इंधनाच्या तुळेत जिओथर्मल ऊर्जेतल्यान सगळ्यांत उण्या प्रमाणांत हरितगृह वायू भायर सरतात, कारण धर्तरे भितरली उश्णताय सैमीक प्रक्रियांचो परिणाम आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
