भांगरभूंय | प्रतिनिधी
नवी दिल्ली, खबरां संस्था ः उदासीनताय ही एक गंभीर मानसीक समस्या. दादल्यांकय लग्नाच्या समस्यांक लागून उदासीनतायेचो त्रास जाता. देखूनच ते आत्महत्या करपाचें पावल उबारतात. हें आतां आंकडेवारींतल्यान सिध्द जालां. लग्न संबंदीत समस्यांक लागून आत्महत्या करपी दादल्यांचो आंकडो बायलां परस वाडला.
नॅशनल क्रायम रेकॉर्ड ब्युरोच्या (एनसीआरबी) ताज्या आंकडेवारी प्रमाण देशांतल्या समाजीक आनी मानसीक भलायकेच्या गतिशीलतेत म्हत्वाचो बदल जाला.
एनसीआरबीचो अहवाल
2023 वर्साच्या एनसीआरबीच्या अहवालांत लग्नाच्या ताणांतल्यान 4,863 दादल्यांनी आत्महत्या केल्ल्याचें स्पश्ट जालां. जाल्यार ह्याच कारणाक लागून आत्महत्या करपी बायलांचो आंकडो 4,180 आशिल्लो. 2022त आत्महत्या करपी दादल्यांचो आंकडो 4,237 आनी बायलांचो आंकडो 3,926 आशिल्लो. फकत एक दशका आदीं ही परिस्थिती सामकी उरफाटी आशिल्ली. 2015त लगन्याच्या समस्यांक लागून सुमार 4 हजार बायलां आनी 2497 दादल्यांनी आत्महत्या केल्ली. हाचे वयल्यान फाटल्या कांय वर्सांत हांतूत नेटान बदल जाता तें स्पश्ट जाता.
लगन्याच्या कांय समस्या मदीं हुंड्या संबंदी वाद, लग्न जुळप ना, लग्ना उपरांत संबंद (Extramarital affair), घटस्फोट आनी वेगळे जावपाचो ताण हांचो आस्पाव आसा. हुंड्याक लागून आत्महत्या करपाचें प्रमाण अजूनय बायलां मदीं चड आसलें तरी घटस्फोट, लग्ना उपरांत भायर संबंद आनी वेगळे जाले उपरांत भावनीक ताण हांचे संबंदीत प्रकरणांत आतां दादल्यांचो आंकडो वाडला.
तीस वर्सां पिरायेच्या दादल्यांक चड ताण
30 वर्सां पिराये वयर आशिल्ल्या 10,816 दादल्यांनी लग्नाच्या ताणांतल्यान आत्महत्या केल्या, जाल्यार 6,619 बायलांनी आत्महत्या केल्या. 30 वर्सां सकयल्या पिरायेच्या गटांत बायलांचो आंकडो दादल्यांपरस चड आसा. ह्या गटातल्या 13,921 बायलांनी, जाल्यार 8,983 दादल्यांनी आत्महत्या केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
