भांगरभूंय | प्रतिनिधी
गोंयां भायरूय लग्ना खातीर जाता नांवनोंदणी
पणजी: चल्या परस चलयांचो आंकडो उणो आशिल्ल्यान लग्न जुळोवक आडखळी आतां वाडल्यात. न्हवरो-व्हंकल मंडळां तशेंच भुरग्यांचे पालक लग्न जुळोवपाक आतां न्हवरो-व्हंकल मेळाव्यांचो आदार घेतात. न्हवरो-व्हंकल मेळाव्यांत चल्यांच्यो आनी चलयांच्यो गांठीभेटी घालून दिवप शक्य जाता. तशेंच गरजेची ती चर्चा करप शक्य जाता अशी म्हायती न्हवरो-व्हंकल मंडळां कडल्यान मेळ्ळी.
गोंयांत न्हवरो-व्हंकल मंडळांचो आंकडो वाडत आसा. लग्ना खातीर नोंदणी करपाचें प्रमाण वाडत आसा. सगल्या मंडळा कडेन चल्या परस चलयांचो आंकडो उणो आसा. फोंडेंची लक्ष्मी जोग ही खूबशीं वर्सां नोंदणी करून लग्नां जुळोवपाचो उपक्रम करता. हांवें खूबशे खेपे लग्न जुळोवपा खातीर मध्यस्ती केल्या. आतां हांव सक्रीयपणान हो उपक्रम करिना. तरी लेगीत एखाद्या चल्याक योग्य चली आमकां दिसलें जाल्यार वाटाघाटी करपा खातीर बरोच वेळ वता अशें तांणी सांगलें.
गोंयांतूच न्हय जाल्यार गोंयां भायर म्हणल्यार महाराष्ट्रांत लेगीत गोंयचे पालक लग्ना खातीर नांवनोंदणी करतात. सातारा (महाराष्ट्र) हांगा आरती फडणवीस ही बायल ब्रम्हवेद न्हवरो-व्हंकल मंडळ चलयता. गोंयकार चले आनी चलयांची लेगीत हांवें लग्नां जुळयल्यांत. गोंयांत चलयांचें प्रमाण उणें आशिल्ल्यान गोंयच्या खूबशा चल्यांचीं नांवां म्हजे कडेन नोंद जाल्यात. महाराष्ट्रांत लेगीत आतां चलयांचो आंकडो उणो जाला. तशेंच गोंय पयस आशिल्ल्यान खूबशा चलयांची लग्न जावन गोंयांत वचपाची तयारी नासता. हाका लागून गोंयांतलीं लग्नां जुळोवप म्हाका आतां कठीण जाता अशें आरती फडणवीस हांणी सांगलें.
दिसाळ्यांनी जायरात दिवपा सयत आमी न्हवरो-व्हंकल मेळाव्यांचें आयोजन करतात. पालक चलयेक तशेंच चल्याक घेवन मेळाव्याक येतात. मेळाव्यांत वळखी जावपा सयत भेटीगांठी जातात. लग्न जुळोवपा खातीर न्हवरो-व्हंकल मेळावो हो पुरक थारता अशें आरती फडणवीस हांणी सांगलें.
कांय वर्सां पयलीं लग्न जुळोवप सोंपें थारतालें. आतां चलयांचो आंकडो उणो आशिल्ल्यान चड यत्न करचे पडटात अशें महालक्ष्मी न्हवरो-व्हंकल मंडळाच्यो मुखेली प्रीती शेटये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
