भांगरभूंय | प्रतिनिधी
कोची: केरळ पुलिसांनी एका लग्नाच्या फटींगपणाच्या प्रकरणाची चवकशी सुरू केल्या. ह्या प्रकरणांत एके बायलेन राज्यांतल्या विंगड विंगड जिल्ह्यांतल्या उण्याच सात दादल्यांक फटयिल्ल्याचो आरोप आसा. पुलिसांनी तिका अटक केल्या. तिचें नांव रेश्मा. ती एर्नाकुलम रावता आनी दोन वर्सांच्या चल्याची आवय. तिका ६ जुनाक जावपी तिच्या नव्या लग्ना पयलींच अटक केली.
तिचो सध्याचो न्हवरो, जो पंचायत वांगडी आसा, ताका तिच्या बॅगान ४५ दिसां पयलीं जाल्ल्या दुसर्या लग्नाची कागदपत्रां सांपडलीं तेन्ना ते बायलेचीं फटींगपणां मुखार आयलीं. ताका ही बायल फटयता अशें समजताच तांणे पुलिसांक म्हयती दिली आनी लग्नाच्या सभाघरांत प्रवेश करचे पयलींच रेश्माक अटक केली.
पुलिसांचे म्हायती प्रमाण, रेश्मा लग्न जावपाक इत्सूक आशिल्ल्या न्हवर्यांक आकर्शीत करपा खातीर ऑनलायन जायरात दिताली. ह्या प्रकरणांत, पंचायत वांगड्यान एका मॅट्रिमोनियल ग्रुपांत आपलो मोबायल नंबर नोंद केल्लो. जाचेवेल्यान रेश्माची आवय आशिल्ल्याचो दावो करपी एके बायलेन ताका संपर्क केलो.
सुरवातेक उलोवप जाले उपरांत रेश्मा त्या मनशाक येवन प्रत्यक्षांत मेळ्ळी. फोन नंबर घेतलो आनी उपरांत साखरपुडो जालो. आपूण दत्तक, आपलो छळ जाला आनी कुटूंब लग्नाक विरोध करतात अशी काणी तिणें सांगली. हाका लागून आपलीं सोयरीं लग्नाक येवचीं नात अशेंय सांगलें.
अधिकारी आतां तपास करतात. तिणें सात जाणांक फटयल्यात, आनीक कितल्या जाणां कडेन लग्न केलें आनी हाचे फाटलो हेतू कितें आशिल्लो हाचो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
