भांगरभूंय | प्रतिनिधी
लग्न म्हळ्यार दोन आत्म्यांचें बंधन. लग्न हो फक्त दोन व्यक्तींक एकठांय हाडपी समाजीक वा धर्मीक विधी न्हय, तर दोन कुटुंबां आनी दोन संस्कृताय जोडपी एक म्हत्वाचो धागो. जिणेच्या ह्या म्हत्वाच्या पांवड्यार दोन मनीस एकामेकांक आदार दिवपाचें, सूख-दुख्खांत वांटो घेवपाचें आनी नव्या जिविताक सुरवात करपाचें उतर दितात. लग्न संस्थेचें म्हत्व फक्त वैयक्तीक जिणेंत न्हय, तर समाजाचे निर्मितींत अमुल्य आसा. संवसारभरांतले वेगळे वेगळे संस्कृतायेंत लग्नाची संकल्पना वेगळी वेगळी आसुये. कांय कडेन लग्नाक धर्मीक विधी मानतात, जाल्यार कांय कडेन ताका समाजीक करार मानतात.
लग्नाचे जायते प्रकार आसात. मोगान लग्न, दोन कुटुंबां मदीं थारावन केल्लें लग्न, आंतरजातीय लग्न, आंतरधर्मीय लग्न आनी आतां लिव्ह इन रिलेशनशीप सारकिल्ल्यो संकल्पनाय समाजांत सामान्य जावपाक लागल्यात. दर एका प्रकाराक खाशेलेंपण आसता. भारता सारक्या देशांत लग्नाक खाशेलें म्हत्व आसा. हांगा लग्न फक्त दोन व्यक्तीं पुरतें मर्यादीत न्हय, तर दोन कुटुंबांच्या प्रतिश्ठे कडेन जोडिल्लें आसता. आयज लेगीत जायत्या सुवातींनी दोन कुटुंबांतले वांगडी योग्य जोडिदार सोदतात. मागीर वेवस्थीत चर्चा करुन लग्न थारावपाची पद्दत व्हड प्रमाणांत चलता.
पूण आर्विल्ल्या काळांत तरणाटी पिळगी मोगान लग्न जावप हाका चड म्हत्व दिता आनी स्वताचे आवडी प्रमाण जोडिदार वेंचपाची प्रवृत्ती वाडत आसा. लग्नांतल्यान दोन मनशांक भावनीक आनी मानसीक आदार मेळटा. जिणेंतल्या उतार-चडावांतल्यान एकामेकांक आदार दिवप कठीण परिस्थितींत लेगीत झगडपाची प्रेरणा मेळटा. संयुक्त कुटुंब वेवस्थेंत लग्न जाले उपरांत कुटुंबाचो विस्तार जाता आनी जायत्यो पिळग्यो एकठांय रावतात, जाका लागून मोग, आनी परंपरेची देवाण-घेवाण जाता.
आयच्या आर्विल्ल्या काळांत लग्ना विशींचे परंपरीक विचार बदलत आसात. लैंगीक समानताय, वैयक्तीक स्वातंत्र्य, करियर ह्या सारक्या गजालींक चड म्हत्व दितात. देखून लग्नाची व्याख्या आनी तातूंतली भुमिका हातूंतय बदल दिसपाक लागल्यात. फक्त बायलेन घराची जतनाय घेवची वा घोवान भायलें काम करचें अशी संकल्पना आतां फाटीं पडपाक लागल्या. दोगांयनी समान जापसालदारकी वांटून घेवची अशी अपेक्षा वाडत आसा. लग्न संस्थेंतय कांय आव्हानां आनी समस्या आसात. जायते फावटीं अपेक्षांचो भार, अर्थीक अडचणी, कुटुंबीक मतभेद आनी वैयक्तीक स्वातंत्र्याचो उणाव हांकां लागून नात्यांत ताण निर्माण जावंक शकता. घटस्फोटा सारक्यो घडणुको समाजांत वाडत आसात, ताका लागून वैवाहीक जिणेंत अस्थिरताय दिसून येता. देखून लग्न तिगोवन दवरपा खातीर संवाद, समजूत आनी परस्पर आदर गरजेचो अशें म्हजें मत.
लग्ना भायल्या संबंदाक लागून फक्त एक नातें न्हय, तर पुराय कुटुंब काबार जावंक शकता. मोग, विस्वास आनी निश्ठा हे खंयच्याय नात्यांतले तीन खांबे, पूण लग्ना उपरांत जेन्ना भायले संबंद भितर सरतात तेन्ना तिनूय खांबे कोसमेतात. क्षणीक आकर्शणाक लागून वा भावनीक गुंतवणुकेक लागून जायते जाण चुकीचे निर्णय घेतात. ह्या निर्णयाचो परिणाम फक्त घोव-बायलेच्या संबंदाचेरच न्हय, तर पुराय कुटुंबाचेर जाता. दुबाव, वाद, ताण आनी निमाणें नातें मोडटा. एक निर्णय जोडिदाराक खोलायेन दुखोवंक शकता. भुरग्यांचें पुराय जिवीत दावाचेर पडूंक शकता. एक विखंडीत संवसार, भायल्यान विचारिल्ले प्रस्न आनी हेर जायत्या गजालींक लागून तांचें जिवीत नाश जावंक शकता. एकदां विस्वास मोडलो म्हणटकच तो परतून बांदप कठीण. लग्ना भायले संबंद, नातेंच मोडून उडयना, जाल्यार मनाची शांती, कुटुंबीक आदार आनी समाजीक मान लेगीत उणो जाता.
निमाणें लग्न हें दोन आत्म्यां मदलें पवित्र आनी म्हत्वाचें बंधन. तातूंत मोग, विस्वास, समर्पण सारकिल्ल्या भावनांचो आस्पाव आसता. बदलत्या काळा प्रमाण लग्नाचे स्वरूप आनी नदर बदलत आयल्यात तरी मनशाच्या जिवितांत ताचें म्हत्व बदलूंक ना. फक्त हें बंधन चड घटमूट आनी टिकावू करपाचे यत्न करपाची गरज आसा. दोन जाणांनी एकामेकांक समजून, आदार दिवन आनी मान दिवन आपलें लग्न जिवीत सुखी आनी समाधानकारक करपाचो
यत्न करचो.
म्हज्या मता प्रमाण जेन्ना तुमी तुमच्या जोडिदाराक आनी तुमच्या कुटुंबाक प्राधान्य दितात तेन्नाच तुमी खऱ्या अर्थान खुशाल आनी येसस्वी जातात.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
