भांगरभूंय | प्रतिनिधी
नवी दिल्ली, खबरां संस्था ः दक्षीण दिल्लींत एका बापायन आपल्या 29 वर्सां पिरायेच्या पुताची ताच्या लग्नाच्या दिसा हत्या केली. देवळी एक्सटेंशन वाठारांतल्या ताच्या घरांतच ही घडणूक घडली. हत्या जाल्ल्या पुताचे नांव गौरव सिंघल. तो फिट बॉक्स जिमाचो धनी आशिल्लो. बापायन ताच्या तोंडार आनी छातीर 15 फावटीं चाकू मारिल्ल्यान गौरव हाका जाग्यारुच मरण आयलें. उपरांत बापायन तांची कुड लागसरच्या एका पार्कात व्हरुन उडयली.
पुलिसांनी सांगिल्लें प्रमाण गौरव दर दिसा आपल्या बापायचो रंगालालाचो अपमान करतालो. तशेंच आरोपीचे बायले कडेन आनी पुता कडेन संबंद बरें नाशिल्ले, तांचे मदीं खूबदां वाद जाताले. देखून ताणें रागान आपल्या पुताची हत्या केली. शुक्रारा पुलिसांनी बापायक अटक केली.
ही घडणूक घडली त्याच दिसा गौरवाचें लग्न आशिल्लें. तें एक अरेंज मॅरेज आशिल्लें. गौरवाचे इश्ट, सोयरे ताच्या लग्नाच्या मिरवणुकेची तयारी करताले. सगळे व्हड उमेदीन नाचताले. पूण थंय गौरव दिसूंक ना. देखून कुटुंबान ताचो सोद घेवपाक सुरवात केली तेन्ना लागसारच्या पार्कांत ताची कूड मेळ्ळी. उपरांत ताका हॉस्पिटलांत व्हेलो, पूण दोतोरांनी ताका मेल्ल्याचे जाहीर केलें. मजगतीं, गौरवाचो बापूयय थंयच्यान पळून गेलो. पुलिसांनी ताचो सोद घेवपाक सुरवात केली तेन्ना बिरेस्तारा सांजवेळार तो मेळ्ळो. उपरांत ताका पुलिसांनी अटक करुन फुडली चवकशीं सुरु केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
