लग्नाचो भार उणो करपा खातीर ‘कन्यादान येवजणे’ त वाड

भांगरभूंय | प्रतिनिधी

महाराष्ट्र सरकारची घोशणा

मुंबय, खबरां संस्था ः लग्न सुवाळो म्हळ्यार हालींच्या काळांत साकरपुडो, प्री वेडिंग शूट, हळद, मेहंदी, लग्न, रिसेप्शन, पूजा आनी हेर जायत्या गजालींच्या खर्चाचें वजें पडटा. देखून लग्नाचें वजें उणें करपा खातीर महाराष्ट्र सरकाराची ‘कन्यादान येवजण’ खाशेली थारता. महाराष्ट्राचे मुख्यमंत्री एकनाथ शिंदे हांणी राज्य सरकाराच्या ‘कन्यादान येवजणे’ खाला अर्थीक मजत 10 हजार रुपयां वयल्यान 25 हजार रुपया मेरेन वाडोवपाची घोशणा केलां.

कन्यादान येवजण म्हळ्यार कितें?

महाराष्ट्र सरकाराच्या समाजीक न्याय आनी विशेश मजत खात्याच्या अधिकृत संकेतथळार दिल्ल्या म्हायती प्रमाण लग्न सुवाळ्यांत जावपी खर्चाचो भार उणो करपा खातीर आनी सामुहीक आयोजन करपी स्वयंसेवी संघटनांक प्रोत्साहन दिवपा खातीर महाराष्ट्र सरकाराच्या समाज कल्याण खात्यान कन्यादान येवजण सुरू केल्ली. कन्यादान येवजणे वरवीं अनुसुचीत जाती, बहिश्कृत जाती, भटक्या जमाती, खाशेले मागास वर्ग आनी हेर मागास वर्ग कुटुंबांतल्यान सामुहीक लग्नांत वांटो घेवपी जोडप्यांक अर्थीक मजत दितात. हे येवजणे खाला सध्या कुटुंबांक 10 हजार रुपया आनी स्वयंसेवी संस्थांक दरेकी जोडप्या फाटल्यान 2000 रुपया दितात. आतां ही रक्कम 25 हजार मेरेन वाडोवपाचो महाराष्ट्र सरकाराचो हेत आसा.

कन्यादान येवजणेचो लाव घेवपाच्यो अटी…

१. न्हवरो- व्हंकल महाराष्ट्र राज्यांतले रहिवासी आसूंक जाय.
२. न्हवऱ्याची पिराय 21 वर्सां आनी व्हंकलेची पिराय 18 वर्सां परस उणी आसूंक फावना.
३. जात प्रमाणपत्र सक्षम आनी अधिकृत अधिकाऱ्यान दिल्ले आसचें.
४. न्हवरो/ व्हंकलेतले दोगूय वा एकलो अनुसुचीत जाती (नवबौध्द), विमुक्त जाती, भटक्या जमाती (धनगर आनी वंजारी) आनी खाशेल्या मागास वर्गांतलो आसूंक जाय.
५. बालविवाह प्रतिबंध कायदो आनी दहेज प्रतिबंध कायद्या खाला जोडप्यान वा कुटुंबांनी खंयच्याच कलमाचें उल्लंघन करूंक ना अशें लेखी प्रतिज्ञापत्र सादर करचे पडटले.

हे येवजणेचो फायदो फकत पयल्या लग्नाक आनी विधवा बायलांक दुसऱ्या लग्नाक घेवंक मेळटा. कन्यादान येवजणे खातीर अर्ज करपा खातीर संबंदीत स्वयंसेवी संस्थेन समाज कल्याण सहाय्यक आयुक्ता कडेन प्रस्ताव सादर करप गरजेचो आसा.