भांगरभूंय | प्रतिनिधी
दुबावीत मैनूल चौधरीक हणजूणें पुलिसांनी केली अटक
भांगरभूंय । प्रतिनिधी
म्हापशें: आसगांवच्या एका रॅस्टोरंण्टांत बार अटेंडण्ट आशिल्ले चलयेक लग्नाचें हायस दाखोवन तिचेर बलात्कार केल्ल्या प्रकरणांत हणजूणें पुलिसांन मैनूल सहन चौधरी (पश्चीम बंगाल) ह्या त्या रॅस्टोरंण्टाच्या मॅनेजराक अटक केली.
हो लिंगीक अत्याचाराचो प्रकार 5 डिसेंबर 2023 ते 28 डिसेंबर 2023 ह्या काळांत घडिल्लो. दुबावितान पिडीत चलये कडेन इश्टागत केली आनी ताका लग्नाचें हायस दाखयलें. उपरांत वयल्या 23 दिसांच्या काळांत दुबावितान पिडेस्त चलयेचेर खूब खेपे बलात्कार केलो. उपरांत दुबावीत काम सोडून पळून गेलो.
ह्या प्रकरणांत पिडीत चलयेन हणजूणें पुलिशेंत कागाळ दाखल केली. ताच्या आदारान दुबाविताक धरपाक पुलीस पंगड पश्चीम बंगालांतल्या दुबाविताच्या घरा गेले, पूण थंय तो मेळूंक ना. ते उपरांत दुबावीत नागपूर- महाराष्ट्रांत आशिल्ल्याची म्हायती पुलिशेक मेळ्ळी.
मेळिल्ले म्हायतीच्या आदारान पुलीस उपनिरिक्षक स्वप्नील नायक, कॉन्स्टेबल अभिषेक कासार, सुधीर सावंत हांणी नागपूर पुलिशेचे मजतीन दुबाविताक धरलो आनी गोंयांत हाडून ताचे आड गुन्यांव नोंद करून रितसर अटक केली. म्हापशें न्यायालयान दुबाविताक तीन दिसांची पुलीस कोठडी फर्मायल्या. फुडलो तपास वरिश्ठांच्या मार्गदर्शना खाला पुलीस उपनिरिक्षक स्नेहा सावळ करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
