लग्नाचें जेवण

भांगरभूंय | प्रतिनिधी

रांगेत जेवतना जेवणाक आदर आसता, बुफे आसतना एकाच सुवातेर बसपाक थीरताय ना, दर खेपे प्लेटींतलें सोंपतकच उठचें पडटा, आनी एकाच वेळार जाय तितले घेवन बसूंक लेगीत मेळना.

पंदरा दिसां पयलीं हांव म्हजे आवय बरोबर खंय तरी लग्नाक गेल्लों. लग्न खूब मनोरंजक आशिल्लें. ल्हान अशी स्टेज आनी ती फुलांनी आनी दिव्यांनी सजयिल्ली. न्हवरो-व्हंकलेक परबीं दिवपा खातीर व्हड रांग लागिल्ली. आमीय ते रांगेंत उबीं रावलीं आनी अर्द वरान आमची पाळी आयली तेन्ना आमी न्हवरो-व्हंकलेक परबीं दिली आनी उपरांत जेवपाक गेलीं. आयजकाल केळीच्या पानार बसप वा पंगत करून ताटांत जेवप दुर्मीळ आसा. ताचे बदला आतां बुफे दितात. थंयूय तें आशिल्लें.
सगल्या खाद्यपदार्थांचे- चायनीज, थाई, इटालियन, दक्षीण भारतीय, पंजाबी, भेळपुरी स्टॉल लायिल्ले. तशेंच येवकारा खातीर पेय म्हूण तीन चार प्रकारचे मॉकटेल आशिल्ले. तातूंत पाचवे कबाब, पनीर टिक्का आनी आलू चाट सारके खूबशे चविश्ट पदार्थ लेगीत आशिल्ले. इतले स्टॉल आनी ताचे वेले जेवण पळोवन हांव अजापलों.
ही सगली धामधूम पळाेवन म्हाका अजाप जालें. त्या स्टॉल्सा वेल्या कांय वेगळ्यावेगळ्या पदार्थांचो आस्वाद घेतले उपरांत, आमी आमचे लक्ष गोड पदार्थांचेर वा आधुनीक भाशेंत डेझर्ट्सा कडेन मिठायांचेरवळयलें. त्या स्टॉलार ते खरेच बरे आशिल्ले. थंय गुलाब जामून, गरमगरम जिलबी, कुल्फी फालुदा, चीजकेक आनी दोन-तीन प्रकारचे आयस्क्रीम अश्यो वेगळ्योवेगळ्या मिठाय आशिल्ल्यो. ताचो आस्वाद घेतले उपरांत आमी थंय खावची पानां घेवपाक गेले आनी स्टॉलार दोन ते पांच प्रकारचीं पानां, वेगळ्यावेगळ्या चवींचे विवीध प्रकारचे सुवादीक पावडर आनी बीट आनी बडीशेप आशिल्ले.
एका दिसा खातीर पयसो खूब मोडटात. मजा करपा खातीर… पूण म्हाका दिसता ताकाय बी एक मर्यादा आसूंक जाय. कितल्या गरीब लोकांक सादें एक वेळचें जेवण लेगीत मेळना… आनी अशा सुवाळ्यांनी अन्नाचें लुकसाण आमी टाळूंक शकतात? हें म्हाका पळोवपाचें आसा. बुफे पद्दतींत जे जेवण घेतात तांणी आपल्याक जाय तितलेंच जेवण घेवचें… आनी जेवणाचो योग्य तो आदर करचो.
नाजाल्यार म्हाका दिसता बसपाची रांग खूब सुंदर आसा. ताटा भोंवतणी अशी सुंदर रांगोळी मनाक आनंद दिता… धुपाचे भोंवतणी संगिाताचो आवाज आयकूं येता. वातावरण सुंदर आसता आनी जेवण घेतना मन खरेंच समाधान जाता. रांगेंत बशिल्ले सगलेच आपले मदीं थोडें अंतर दवरून वेवस्थीत बसतात आनी जेवपाक व्यस्त आसतात. रांगेत जेवतना जेवणाक आदर आसता, बुफे आसतना एकाच सुवातेर बसपाक थीरताय ना, दर खेपे प्लेटींतलें सोंपतकच उठचें पडटा, आनी एकाच वेळार जाय तितले घेवन बसूंक लेगीत मेळना. देखून म्हाका बुफे शैली परस पंगत शैलीचें जेवण चड आवडटा.
पूण आयज लग्नांत उण्यांत उणें 400 ते 500 लोक आसतात. ताका लागून ही बुफे पद्दत लेगीत थोडी बरी दिसता. आमी जेवणाचे कुडींत जेवणाचो आनंद घेतात. बुफेंतेलें जेवण जेवतात तें जेविल्ले भशेन दिसत नासलें तरी आयच्या धांवपळीचे जिणेंत चड करून लग्न सुवाळ्यांनी आनी व्हड कार्यावळींनी बुफे बगर पर्याय ना हेंवूय तितलेंच खरें.

गौरी भालचंद्र
9422373926