भांगरभूंय | प्रतिनिधी
नवी दिल्ली, खबरां संस्था ः भारतीय दंड संहितेंत बदल जाले उपरांत वैवाहिक जिवीत लिपोवप ही फटवणूक, अशें मानतले. अशें केल्यार खर ख्यास्त जावंक शकता. ही शिफारस केंद्रीय गृह मंत्रालयाचेर संसद स्थायी समितीन केल्या. फौजदारी कायद्यां बदला प्रस्तावीत केल्ल्या तीन नव्या कायद्यांचो नियाळ घेतले उपरांत समितीन ही शिफारस केल्या. ही लव्ह जिहाद आड खर तरतूद आसा अशें म्हण्टात.
भारतीय न्याय संहिता विधेयकाच्या कलम 69 खाला फटवणूक करुन वा लग्नाचे नाटका करुन शारीरिक संबंद दवरप म्हळ्यार बलात्कार अशें मानपाचो प्रस्ताव आसा. अशा प्रकरणांत 10 वर्सां मेरेन बंदखण आनी दंडाची ख्यास्त आसा. ‘वैवाहिक स्थिती’ लिपोवपाचोय हे तरतुदी खाला आस्पाव करचो अशी शिफारस समितीन केल्या. समितीन सांगलें, अशीं जायतीं प्रकरणां न्यायालयांत आयलीं. संसदेंत सादर केल्ली भारतीय न्याय संहिता, भारतीय नागरी संरक्षण संहिता आनी भारतीय पुरावो विधेयक नियाळ उपरांत संसदेच्या शिंयाळ्या अधिवेशनांत मांडटले. हें अधिवेशन 4 डिसेंबर सावन सुरू जातलें.
हिंदी नांवां कलम 348च्या आड आसात?
सूत्रांनी दिल्ले म्हायती प्रमाण, समितीच्यो चडश्यो शिफारसी सरकार मान्य करूंक शकता. पूण विरोधकांनी तांच्या हिंदी नांवाक विरोध केला. तशेंच हे प्रक्रियेचो एक भाग म्हणून पोरणें कायदे फकत कॉपी करून पेस्ट केले असोय आरोप केला. समितीचो वांगडी काँग्रेसीचो फुडारी पी. चिदंबरम आनी द्रमुक फुडारी दयानिधी मारन हांणी हिंदी नांवां हीं कलम 348 आड आसात अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
