भांगरभूंय | प्रतिनिधी
भांगरभूंय । खबरां संस्था
मेलबर्न : श्रद्धा वालकरच्या खून प्रकरणा सारकीच केश ऑस्ट्रेलियेंत उजवाडाक आयल्या. 21 वर्सां पिरायेचे भारतीय नर्सिंग विद्यार्थिनीन लग्न जावपाक न्हयकार दिल्ल्यान हो खून जाला. आरोपीन पयलीं तिचे हात- पांय बांदून अपहरण केलें, उपरांत गळो चिरून तिका जिवीच पुरली. तो तिचो आदलो इश्ट. बरोच तेंप तो तिका त्रास दितालो. बिरेस्तारा ऑस्ट्रेलियन न्यायालयांत जाल्ले सुनावणे वेळार ह्यो गजाली उजवाडाक आयल्यात. आरोपीक जल्मठेप फर्मायल्या.
जास्मीन कौर अशें पिडितेचें नांव. ती अॅडलेड शारांत रावताली. आरोपी तारिकज्यो सिंग (22) हाणें 5 मार्च 2021 दिसा तिच्या कामाचे सुवाते वेल्यान अपहरण केल्लें. उपरांत तिचे हात- पांय सरयांनी बांदून तिका गाडयेंत घालून व्हेल्ली.
तारिकज्यो हांणी जास्मीनाक 643 किमी पयस आशिल्ल्या फ्लिडंर्स रेंजांत व्हेली. पयलीं तिच्या गळ्यार बरेच वार केले. उपरांत जिवी जमनींत पुरली. ऑक्सिजन नाशिल्ल्यान तिका मरण आयलें.
फाटल्या वर्सा चलयेचे आवयन चली बेपत्ता जाल्ल्याची कागाळ केल्ली. तारिकज्योताचेर चलयेक त्रास दिवप, अपहरण करप आनी खून करपाचो आरोप आवयन केल्लो. प्राथमीक चवकशेंत तारीक ज्योत हांणी आरोप न्हयकारिल्लो. जास्मीनान आत्महत्या केल्ल्याचें ताणें पुलिसांक सांगिल्लें. आपणेंच तिची कूड पुरल्या अशेंय तांणी सांगिल्लें. पूण, अंदूं फेब्रुवारींत खटलो सुरू जावचे पयलीं ताणें गुन्यांव कबूल केलो. तशेंच जास्मीनाच्यो वस्तू आनी कूड खंय पुरल्या हाचीय म्हायती पुलिसांक दिली.
वस्तू आनी कूड मेळ्ळ्या उपरांत पुलिसांनी आरोपीक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
