भांगरभूंय | प्रतिनिधी
भारत आतां अश्या उत्सवांच्या हंगामांत प्रवेश करता, जो आदीं केन्नाच पळोवंक ना. १ नोव्हेंबर ते १४ डिसेंबर २०२५ मजगतीं देशांत वट्ट ४६ लाख लग्नां जावपाचीं आसात. हो भारताच्या इतिहासांतलो सगल्यांत व्हड लग्नांचो हंगाम थारतलो.
कन्फेडरेशन ऑफ ऑल इंडिया ट्रेडर्सच्या अदमासा प्रमाण, ह्या लग्न सुवाळ्यांतल्यान वट्ट ६.५ लाख कोटू रुपयांचो वेपार जावपाचो आशिल्ल्यान भारतीय लग्नांच्या वैभवा वांगडाच ताच्या अर्थचक्रांतले वाडपी भुमिकेचो तो पुरावो आसा.
देशभरांत वॅडींग प्लॅनर्स, ज्वेलर्स, डिझायनर्स, केटरर्स आनी डेकोरेटर्स ह्या सगल्या मळांचेर व्हड मागणी वाडपाची शक्यताय आसा. राजधानी दिल्लींतूच सुमार ४.८ लाख लग्नां जावपाचीं आशिल्ल्यान थंय १.८ लाख कोटी रुपयांचो खर्च अपेक्षीत आसा.
वट्ट खर्चांत भांगरा वस्ती सुमार १५%, कपडे आनी साडयो १०%, केटरिंग १०%, जाल्यार इव्हेंट मॅनेजमेंट ५% इतकें योगदान दितले. इलॅक्ट्रॉनीक्स, मिठाय, सजावट अश्या हेर वाठारांनीय बरोच व्हड फायदो जावपाचो आसा.
सेवा मळार म्हळ्यार फोटोग्राफी, प्रवास, म्युझीक बँड, फुलांची सजावट, सावंड आनी लायटी ह्या सगल्यांची फाटल्या कितल्याशाच वर्सां सावन सगल्यांत चड मागणी आसा.
ह्या लग्नांचे खरेदींतल्यो ७०% वस्तू आनी सेवा भारतीय उत्पादक आनी थळाव्या पुरवणदारां कडल्यानूच घेवपाची अपेक्षा आसा. मागीर त्यो हातमाग साडयो आसूं, थळावे ज्वेलरी ब्रँड्स, फुलांचे कारागीर वा जेवणाची पुरवण आसूं.
ह्या ४५ दिसांच्या लग्नहंगामांतल्यान सुमार १ कोटी रोजगार निर्मिती जावपाची आशिल्ल्यान हातूंत हॉस्पिटॅलिटी, लॉजिस्टिक्स आनी इव्हेंट मॅनेजमेंट मळार व्हड वाटो आसतलो. तशेंच ७५,००० कोटी रुपया कर उत्पन्न मेळपाचो अदमास आशिल्ल्यान, हाका लागून देशाचे अर्थवेवस्थेक परबांच्या काळांत व्हड बुस्ट मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
