लखनौ सुपर जायण्ट्साक जैत गरजेचें

भांगरभूंय | प्रतिनिधी

इंडीयन प्रिमीयर लिगेची (आयपीएल) 64वी मॅच येजमान दिल्ली कॅपिटल्स आनी लखनौ सुपर जायण्ट्स ह्या पंगडां मदीं अरुण जेटली मैदानाचेर जातली. तंत्रीक दिश्टीन दोनूय पंगड प्ले ऑफाचे रेसींत आसात. पूण, हेर पंगडांची स्थिती पळयली जाल्यार ह्या दोनूय पंगडांची निमाण्या चारांत सुवात मेळोवपाची शक्यताय खूण उणी आसा. खास करून दिल्ली कॅपिटल्साचो मार्ग कठीण आसा. उरिल्ल्यो सगल्यो मॅची जिखल्यो जाल्यार ताचे चडांतड 14 गूण जातले. लखनौच्यो दोन मॅची बाकी आसात, ताका लागून दोनूय मॅची जिखल्यो जाल्यार ताचे 16 गूण जातले. पूण, प्ले ऑफांत सुवात मेळोवपाक तांकां दुसऱ्या पंगडांच्या निकालांचेर आनी नेटर रन रेटीचेर लेगीत निंबून रावचें पडटलें.

दोनूय पंगड अजून मेरेन एकामेका आड चार मॅची खेळ्ळ्यात. हातूंत लखनौ 3-1 असो मुखार आसा. पूण, अंदूंच्या हंगामांतल्या पयल्या टप्प्यांत एकामेका आड खेळिल्ले, त्या वेळार दिल्लीन 6 विकेटींनी जैत जोडिल्लें.

10 मॅचींनी 15 विकेटी घेवपी कुलदीप यादव दिल्ली कॅपिटल्साचो मुखेल बॉलर थारला. लखनौच्या बॅट्समनांक ताणें नाकापुरो केलां. निकोल पुरनाक ताणें टी-20 क्रिकेटींत पांच खेपे बाद केला. जाल्यार ताच्या आड पुरनाक फकत 91चे स्ट्रायक रेटीन धांवड्यो करप शक्य जालां. क्विंटन डी कॉक आनी दीपक हुड्डा हांकां लेगीत ताणें दरेकी दोन खेपे बाद केल्यात. पूण, फाटल्या कांय मॅची सावन दोगूय निमाण्या इकरांत नात. मार्कस स्टॉयनीसान 140चे स्ट्रायक रेटीन धांवड्यो केल्यात. जाल्यार कुलदीपान ताका एकदा बाद केला.

दिल्लीचो मुखेली ऋषभ पंत एके मॅचीचें निलंबन सोंसल्या उपरांत पुनरागमन करता. पूण, लखनौचे स्पिनर ताचें पुनरागमन अपेशी करपाक शकता. कृणाल पांड्यान ताका तीन खेपे बाद केला. पूण, पंतान ताच्या आड 184चे स्ट्रायक रेटीन धांवड्यो केल्यात. लेग स्पीनर रवी बिश्नोईन लेगीत पंताक दोन खेपे तंबूंत धाडला. जाल्यार पंतान फकत 115चे स्ट्रायक रेटीन धांवड्यो केल्यात. ऑफ स्पिनर कृष्णप्पा गौतमा आड लेगीत पंताची स्ट्रायक रेट फकत 103 आसा. पूण, गौतमाक ताका एकदा लेगीत बाद करपाक जमूंक ना.

हेर पंगडांनी पावर प्लेचो जितलो फायदो घेतला, तसो दोनूय पंगडांक घेवपाक जमूंक ना. दिल्लीन साबार पर्याय वापरून पळयले. पूण, अभिषेक पोरेला खेरीत एकल्याकूय फ्रेजर-मगर्काक येसस्वी साथ दिवपाक जमूंक ना. डॅव्हिड वॉर्नर तंदुरुस्त जावन पंगडांत परतल्या उपरांत अभिषेक बॅटींग करपाक तिसरे सुवातेर पावलो.

लखनौचे बाबतींत तशेंच घडलां. क्विंटन डी कॉकाक लोकेश राहुला वांगडा डावाची सुरवात करपाक धाडलो. जाल्यार दोन मॅचींनी अर्शीन कुलकर्णीक राहुला वांगडा धाडलो. पूण, एकेय जोडयेक पंगडाक बरी सुरवात करून दिवपाक जमली ना.

लखनौक प्ले ऑफांतली आपली आस्त जिवी दवरपाक जाय जाल्यार फकत उरिल्ल्यो मॅच जिखून उपकारच्यो नात, तांकां व्हडा फरकान जैत जोडचें पडटलें. लखनौक फकत 8.35चे रन रेटीन धांवड्यो करप शक्य जाल्यात. दुसरे वटेन दिल्लीन अंदूंच्या हंगामांत 11.06चे रन रेटीन धांवड्यो केल्यात.