भांगरभूंय | प्रतिनिधी
लखनौ, खबरां संस्था: मोहनलालगंज -लखनौंत बिरेस्तारा सकाळीं एके स्लीपर एसी बसीक उजो लागलो. ह्या अपघातांत पांच प्रवाशांक लासून मरण आयलें. मरण आयिल्ल्यां मदीं २ भुरगीं, २ बायलो आनी एका दादल्याचो आसपाव आसा. हे बसींत सुमार ८० प्रवासी आशिल्ले. बस बिहारच्यान दिल्लीक वताली.
आउटर रिंग रोडाचेर फांतोडेर ५ वरांचेर हो अपघात घडलो. तेन्ना चडशे प्रवासी न्हिदिल्ले. बस अचकीत धुंवरान भरपाक लागली. कांय मिनटांनीच उज्याचे लोट येवपाक लागले. बसींत बोवाळ जालो. बस ड्रायव्हर आनी कंडक्टर बस तशीच सोडून पळून गेले. ड्रायव्हराच्या सीटा लागसारा आनीक एक सीट आशिल्लें. अशे परिस्थितींत प्रवाशांक देंवपाक त्रास जालो. जायते प्रवासी आडकले आनी पडले, अशें कांय प्रवाशांनी सांगलें.
आशिकुशीकच्या लोकांनी पुलिसांक आनी उजो पालोवपी दळाक म्हायती दिली. उजो पालोवपी दळाच्यो गाडयो पाव मेरेन पुराय बस लासून गोबोर जाल्ली. उजो पालोवपी दळान सुमार ३० मिनटांनी उजो पालयलो. आमी भितर पावले तेन्ना आमकां ५ कुडी मेळ्ळ्यो.
पुलिसांच्या तपासांत दिसून आयलें की बसीचें आपत्कालीन दार उगडूंक नाशिल्लें. हाका लागून फाटीं बशिल्ले लोक आडकले. बसींत पाच किलाचे सात गॅस सिलिंडर आशिल्ले. मात एकाय सिलिंडराचो स्फोट जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
