भांगरभूंय | प्रतिनिधी
लखनौ सुपर जायण्ट्सान इंडियन प्रिमीयर लिगेंत (आयपीएल) गुजरात टायटन्सा आडची हातांतली मॅच वगडायली. गुजरातान दिल्ले 136 धांवड्यांचे मोखीचो फाटलाव करतना लखनौक 7 विकेटी वगडावन 128 धांवड्यो करप शक्य जाल्यो.
सावकाश खेळपट्टीचेर जंय गुजराताचे बॅट्समन गडगडले, थंय लखनौ सुपर जायण्ट्साच्या लोकेश राहुलान बरी बॅटींग केली. पूण, अखेरचे ओव्हरींत लोकेशाची विकेट पडली आनी मॅच घुंवली. गुजराताचो बॉलर मोहित शर्मान सेगीत चार बॉलांचेर चार विकेटी घेवन मॅच घुंवडायली. अशे तरेन गुजरातान 7 धांवड्यांनी जैत जोडलें.
गुजरातान दिल्ले फकत 136 धांवड्यांचो फाटलाव करपी लखनौची सुरवात बरी जाली. ओपनरांनी अर्द शेंकड्याची भागिदारी करीत जैताची बुन्याद घालून दिल्ली. पूण, हेर बॅट्समनांक ताचो फायदो घेवपाक जमलो ना.
गुजराताच्या मोहम्मद शमीन पयली ओव्हर मेडन घाली आसली तरी शमीच्या फुडले ओव्हरींत लोकेश राहुलान सेगीत तीन चवके मारून 14 धांवड्यो केल्यो. ताणें राशीद खानाक लेगीत दोन चवके मारले.
राहुल आनी कायल मेयर्स हांणी गुजराताची बॉलींग फोडून काडली. दोगांयनी 55 धांवड्यांची भागिदारी केली. पूण, सातवे ओव्हरींत राशीदान लखनौक मोठो धपको दिलो. ताणें मेयर्साक बोल्ड केलो. ताणें 19 बॉलांनी 24 धांवड्यो केल्यो. लोकेशाक 54 धांवड्यांचेर जीवनदान मेळ्ळें. विजय शंकरान सोंपी कॅच सोडली.पूण, दुसरे वटेन नूर अहमदान कृणाल पांड्याक बाद करून गुजराताक दुसरें येस मेळोवन दिलें. कृणाल पांड्यान 23 बॉलांनी 23 धांवड्यो केल्यो. कृणालान राहुला वांगडा मेळून 51 धांवड्यांची भागिदारी केल्ली. आतां गुजरातान चेपण वाडोवपाक सुरवात केली. पूण, राहुल तितकेच ताकदीन संयमान उबो आशिल्लो. नूर अहमदान फुडले ओव्हरींत निकोलस पुरनाक (1) बाद केलो. हार्दिक पांड्यान ताची कॅच धरली. फकत एक धांवडी करून नूर अहमदाच्या बॉलाचेर हार्दिक पांड्याक कॅच दिवन परतलो.
लखनौक 18 बॉलांनी 23 धांवड्यांची गरज आशिल्ली. मॅच उमळशीक वाडोवपी थारली. मोहित शर्मान 18वे ओव्हरींत 6 धांवड्यो दिल्यो. शमीन 19वी ओव्हर बरी घाली. निमाणे ओव्हरींत 12 धांवड्यांची गरज आशिल्ली.
लोकेश राहुलान एक बाजू सांबाळून आपल्या पंगडाक जैताच्या लागसार व्हरपाचो यत्न केलो. पूण, ताका येस मेळूंक ना. लोकेशान दुसऱ्या बॉलाचेर सको मारपाचो यत्न केलो. पूण, मोहित शर्माच्या बॉलाचेर जयंत यादवान कॅच धरली. 61 बॉलांनी आठ चवक्यांचे मजतीन 68 धांवड्यो करून राहुल बाद जालो. मोहिताच्या फुडल्या बॉलाचेर मार्कस स्टॉयनीस कॅच बाद जालो आनी तीन बॉलांनी 10 धांवड्यो अशें समीकरण जालें. चवथ्या बॉलाचेर दोन धांवड्यो घेवपाच्या यत्नांत आयुष बदोनी (10) धांवबाद जालो. फुडल्या बॉलाचेर दीपक हुड्डा धांवबाद जालो. सेगीत चार बॉलांचेर चार विकेटी पडिल्ल्यान लखनौची हार निश्चीत जाली.
ते पयलीं गुजराताच्या बॅट्समनांचो कस लागलो. लखनौन खेळपट्टीचो पुर्ण फायदो घेत गुजराताक 6 बाद 135चेर समाधान मानपाक लायलें. वृद्धिमान साहा (47) आनी हार्दिक पांड्या (66) हांणी बरी बॅटींग केली. कृणाल पांड्यान 16 धांवड्यांनी दोन आनी मार्कस स्टॉयनीसान 20 धांवड्यांनी 2 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
