भांगरभूंय | प्रतिनिधी
लखनौ, खबरां संस्था: लखनौच्या लोकबंधू हॉस्पिटलाचे दुसरे माळयेर रातच्या १० वरांचेर व्हडलो उजो लागलो. हांगा भुरग्यांचें एनआयसीयूय आनी बायलां युनीटूय आसा. हे माळयेचे ३५-४० दुयेंती आशिल्ले.
उज्याचें कारण शॉर्ट सर्किट आशिल्ल्याचें सांगलें. उजो पालोवपी दळाच्यो जायत्यो गाडयो घडणुके सुवातेर पावल्यो. दोतोरांनी सांगलें, दाखल केल्ल्या भुरग्यांक कांयच जावपाक जायना, हे खातीर सगले तरेचे यत्न केले. उपमुख्यमंत्री ब्रजेश पाठक हांणी हॉस्पिटलांत वचून पळोवणी केली .
उज्याक लागून पुराय हॉस्पिटल धुंवरान भरिल्लें. हाका लागून हॉस्पिटला भायर काळोख जालो. हॉस्पिटलाचे मुखेल वैजकी अधीक्षक डॉ. अजय शंकर त्रिपाठी हांणी सांगलें, उजो रातीं सुमार १० वरांचेर लागलो. आतां मेरेनच्या तपासांत उजो लागपाचें कारण शॉर्ट सर्किट आशिल्ल्याचें सांगतात. परिस्थिती नियंत्रणांत आसा.
उज्यांतल्या वाचिल्ल्या दुयेतींनी सांगलें, आमी विसव घेताले. अचकीत धुंवर येवपाक लागलो. उपरांत आमी रोखडेच भायर सरले. काय लोक दुसरे माळयेर आडकले.
लोकबंधू हॉस्पिटलांत लागिल्ले उज्याचे घडणुकेची मुख्यमंत्री योगी हांणी फोनावेल्यान अधिकार्यां कडल्यान घटनेची पुराय म्हायती घेतली.
सध्या हे घडणुकेची चवकशी करपाचे आदेश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
