भांगरभूंय | प्रतिनिधी
इंडियन प्रिमीयर लिगेंत (आयपीएल) काल जाल्ले दुसरे मॅचींत येजमान लखनौ सुपर जायण्ट्सान दिल्ली कॅपिटल्साक 50 धांवड्यांनी हारयलो.
लखनौ सुपर जायण्ट्सान दिल्ले 194 धांवड्यांचे मोखीचो फाटलाव करपी दिल्ली कॅपिटल्साक निर्धारीत 20 ओव्हरींनी 9 विकेटी वगडावन 143 धांवड्यो करप शक्य जाल्यो. मुखेली डॅव्हिड वॉर्नराक (56) सोडलो जाल्यार दिल्लीच्या एकाय बॅट्समनाक व्हड खेळी करपाक जमली ना.
मॅच भारत रत्न श्री. अटल बिहारी वाजपय एकाना क्रिकेट स्टेडियमाचेर जाली.
ते आदीं टॉस हारल्या उपरांत पयलीं बॅटींग करपी लखनौ सुपर जायण्ट्सान निर्धारीत ओव्हरींनी 6 विकेटी वगडावन 193 धांवड्यो केल्यो. लखनौचो मुखेली लोकेश राहुलान वॅस्ट इंडिजाच्या कायल मेयर्सा वांगडा डावाची सुरवात केली. मायर्साची आयपीएलांतली ही पयलीच मॅच आशिल्ली. पूण, ताणें आपले पयलेच मॅचींत स्वताची ताकद दाखोवन दिली.
मायर्सान दिल्ली कॅपिटल्साच्या दरेकी बॉलराची बॉलींग फोडून काडली. ताणें फकत 38 बॉलांनी 83 धांवड्यांची आक्रमक खेळी केली. ताचे आक्रमक खेळीक लागून लखनौन 12वे ओव्हरींत शंबराचो आंकडो हुपलो. पूण, ताची खेळी अक्षर पटेलान सोंपयली. पटेलान ताका बोल्ड केलो. मायर्स बाद जाल्या उपरांत लखनौची धांवगती उणी जाली.
खलील अहमदान आपली फिल्डिंगेंतली चूक बॉलिंगेंत भरून काडटना मार्कस स्टॉयनिसाक (12) आनी निकोलस पुरनाक (36) बाद केलो. पूण, दुसरे वटेच्यान कृणाल पांड्या सादूरतायेन बॅटींग करतालो. ताका साथ दिवपाक आयिल्ल्या आयुष बदोनीन अखेरचे ओव्हरींत चेतन साकरियाक दोन सके मारीत लखनौचो स्कोर 193 मेरेन पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
