भांगरभूंय | प्रतिनिधी
लखनौ सुपर जायण्ट्सान इंडियन प्रिमियर लिगेचे (आयपीएल) 38वे मॅचींत येजमान पंजाब किंग्साक 56 धांवड्यांनी हारयलो.
लखनौ सुपर जायण्ट्सान पयलीं बॅटींग करतना निर्धारीत 20 ओव्हरींनी 5 विकेटी वगडावन 257 धांवड्यो केल्यो. मोखीचो फाटलाव करपी पंजाब किंग्साक 19.5 ओव्हरींनी सगल्यो विकेटी वगडावन 201 धांवड्यो केल्यो.
लखनौन काडिल्लो 257 स्कोर अंदूंच्या हंगामांतलो खंयच्या पंगडान काडिल्लो सर्वोच्च स्कोर थारलो. आयपीएलाच्या इतिहासांतलो सर्वोच्च स्कोर रॉयल चॅलेंजर्स बंगळुरूच्या नांवार आसा. ताणें 2013त पुणे वॉरियर्सा आड केल्लो.
मोखीचो फाटलाव करपी पंजाब एकाय लेगीत जैताच्या लागसार पावतलो अशें दिसूंक ना. ताचे वतीन फकत अथर्व तायडेन 66 धांवड्यांची खेळी केली. ताचे खेरीत एकाय बॅट्समनाक व्हड खेळी करपाक जमली ना. लखनौ वतीन यश ठाकूरान 37 धांवड्यो दिवन 4 विकेटी घेतल्यो. ताचे खेरीत नवीन उल हकान 30 धांवड्यो दिवन 3 विकेटी घेतल्यो. रवी बिश्नोईक दोन जाल्यार मार्कस स्टॉयनीसाक एक विकेट फावो जाली.
ते आदीं पंजाब किंग्सान टॉस जिखून पयलीं बॉलींग करपाचो निर्णय घेतलो. पूण, ताचो हो निर्णय सामको चुकीचो थारलो. बॅटींग करपाक मैदानांत देंविल्ल्या लखनौ सुपर जायण्ट्साच्या बॅट्समनांनी धांवड्यांचो पावस घालो. लखनौचो मुखेली लोकेश राहुल रबाडाचे बॉलिंगेचेर 12 धांवड्यो करून बाद जालो.
ते उपरांत मात केली मेयर्साच्या रुपान वादळ आयलें. ताणें लखनौची धांवड्यांची गती वाडयली. ताणें 24 बॉलांनी 54 धांवड्यो केल्यो. हातूंत सात चवके आनी चार सक्यांचो आस्पाव आशिल्लो. अंदूंच्या हंगामांतलो ताचो हो चवथो अर्द शेंकडो थारलो.
ताका रबाडान तंबूंत धाडलो. ते उपरांत मार्कस स्टॉयनीस मैदानांत देंवलो. ताणें मेयर्साचें काम मुखार व्हेले. ताणें पंजाबाच्या बॉलरांक घाम काडलो. ताणें आयुष बदानी वांगडा मेळून 89 धांवड्यांची भागिदारी केली. बदोनी (43) बाद जाल्या उपरांत स्टॉयनीस आनी निकोलस पुरन हांणी धांवड्यांचो पास घालो. स्टॉयनिसान 40 बॉलांनी 72 धांवड्यांची खेळी केली. तशेंच पुरनान 19 बॉलांनी 45 धांवड्यो केल्यो.
खाशेली गजाल म्हणल्यार लखनौन पावर प्लेंत 74 जाल्यार फकत 10 ओव्हरींनी शंबराचो आंकडो हुपलो. तांकांच लागून लखनौक निर्धारीत 20 ओव्हरींनी 5 विकेटी वगडावन 257 धांवड्यो केल्यो.
पंजाबा वतीन रबाडान 2, अर्शदीप, सॅम करन आनी लिव्हिंगस्टोन हांणी दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
