भांगरभूंय | प्रतिनिधी
भारताचो युवा बॅडमिंटन खेळगडो लक्ष्य सेन हाका हांगा चालू आशिल्ले जपान ओपन सुपर 750 बॅडमिंटन सर्तीचे सेमी फायनलींत हार घेवची पडली. हे हारी उपरांत भारताचें सर्तींतलें आव्हान सोंपलें.
लक्ष्य सेनाक इंडोयनेशियाच्या जॉनाथन क्रिस्टी कडल्यान 15-21, 21-13 आनी 16-21 अशा तीन सेमींनी हार घेवची पडली. 2021चे संवसारीक वस्तादपण सर्तींत कांश्या पदक जिखपी आनी संवसारीक क्रमवारींत 13वे सुवातेर आशिल्ल्या लक्ष्य सेनान पयली गेम वगडायल्या उपरांत उत्कृश्ट रितीन मॅचींत पुनरागमन केल्लें. तशेंच ताणें प्रतिस्पर्धी खेळगड्याचेर चेपण लेगीत दवरिल्लें. पूण, ताका ही लय कायम राखपाक जमली ना आनी अखेरेक एक वर आनी स मिनटां मेरेन चलिल्ले सेमी फायनलींत हार घेवची पडली.
लक्ष्य सेनाचो क्रिस्टी आडचो रॅकॉर्ड 1-1 असो आशिल्लो. लक्ष्य सेन कोर्टाचेर आपले गती खातीर प्रसिद्द आसा. जाल्यार क्रिस्टी जबरदस्त शॉर्ट खेळपाक प्रसिद्द आसा. दोगांयनी उमळशीक वाडोवपी मॅचींत आपलेआपले कुशळटायेचें बरे तरेन प्रदर्शन घडयलें.
इंडोनेशियाच्या खेळगड्यान सुरवातीक कांय चुकी केल्यो, ताचो फायदो लक्ष्य सेनान 7-4 अशी आघाडी घेतली. ते उपरांत लक्ष्य सेनान कांय चुकी केल्यो ताका लागून क्रिस्टीक बरोबरी सादपाक येस मेळ्ळें. सेनान दोन आक्रमक स्मॅश मारून ब्रेका मेरेन दोन गुणांची आघाडी घेतिल्ली. क्रिस्टीन ते उपरांत बरो खेळ केलो आनी 32 शॉर्टांची रॅली जिखून 15-12 अशी आघाडी घेतली. ते उपरांत ताणें फाटीं वळून पळोवंक ना. ताणें पयली गेम 21-15 अशी जिखली.
लक्ष्य सेनाक दुसरे गेमींत आपले रणनितींत बदल करपाची गरज आशिल्ली. ताणें तशी ती केलीय बी. ते पयलीं ताका दुसरे गेमीचे सुरवातीक संघर्श करचो पडलो. पूण, उपरांत ताणें रोखडीच लय मेळयली. ताणें कांय आकर्शक स्मॅश आनी ड्रॉप शॉर्टाच्या नेटार ब्रेका मेरेन 11-5 अशी घटमूट आगाडी घेतिल्ली. ब्रेका उपरांत लेगीत आपली लय कायम राखून 21-13 फरकान दुसरी गेम जिखून मॅचींत 1-1 अशी बरोबरी सादली.
निर्णायक गेमींत लेगीत दोगांयनी जबरदस्त खेळ केलो. पूण, क्रिस्टीन खेळाचेर नियंत्रण दवरून स्कोर 9-6 केलो. ब्रेका मेरेन क्रिस्टी दोन गुणांनी मुखार आशिल्लो. ते उपरांत सेनान नेटाचो खेळ केलो. एका वेळार स्कोर 13-17 असो आशिल्लो. क्रिस्टीन वेवस्थी स्मॅशाचो उपेग करून स्कोर 19-15 केलो. ते परांत ताणें पांच गूण मेळयले. सेनान एक मॅच पॉयण्ट वाटायलो. पूण, उपरांत ताचो शॉर्ट नेटाक लागलो आनी क्रिस्टी फायनलींत पावलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
