भांगरभूंय | प्रतिनिधी
खबरां संस्था
कैल्गरीः भारताचो शटलर लक्ष्य सेनान कॅनडा ओपन बडमिंटन सर्तीच्या फायनलींत प्रवेश केलो.कैल्गरींत सुरू आशिल्ले हे सर्तींत लक्ष्यान जपानाच्या केता निशिमाटोक हारयलें. बायलाचे एकोडींतले सेमीफायनलींत भारताच्या पी व्ही सिंधूक हार ऱावची पडली. पयली सिडेड अकाने यामागुचीन ताका 21-14, 21-15 अश्या सेटांनी हारयलें.
21 वर्सां पिरायेच्या लक्ष्यान शेनवारा रातयां जाल्ले सेमीफायनलींत जापानाच्या निशिमोटोक सरळ सेटांनी हारयलें. ताणे जपानी शटलराचो बचाव तोडून पयलो सेट 21-17 असो जिखलो. दुसऱ्या सेटांत लेगीत तोच फॉर्म दवोरून 21-14 असो जिखलो. निशिमोटोचें कांयच चल्लें ना. सर्त जिखपा खातीर ताका फायनलींत चीनाच्या के ली शीं फेंग हाका हारोवचें पडटलें. जपानाच्या कोडाई नाराकोडाक 21-8, 21-11 अशें हारोवनन फेंग फायनलींत पावला.
लक्ष्य सेन ह्या वर्सा पयले फावट बॅडमिंटन सर्तीचे फायनलींत पावला. पी व्ही सिंधू कडल्यान भांगरा पदकाची अपेक्षा आशिल्ली मात सेमीफायनलींत ताका जपानाच्या अकाने यामागुचीन 21-14, 21-15 अशें सरळ सेटांनी हारयलें. टॉप सीड यामागुची फायनलींत थायलंडाच्या रत्वानोक इंतानोन हाच्या आड खेळटलें. ताका सेमीफायनलींत अमेरिकेच्या बिवेन झांग कडल्यान वॉक ओव्हर मेळ्ळो.
अकाने यामागुचीन पी व्ही सिंधूक 11 फावट हारयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
