भांगरभूंय | प्रतिनिधी
पणजी: गोंयची परंपरीक वळख आशिल्ल्या धिरयो आनी लोकप्रिय थारिल्ल्या ’हाऊझी’ खेळार प्रशासनान कायदेशीर बंदी घातले उपरांत, आतां आयोजकांनी पळवाट सोदीत ’लकी डोनेशन कुपन्स’च्या नांवाखाला नवो प्रकार सुरू केल्ल्याचें धक्को दिवपी सत मुखार आयलें. वळवय वा मडगांव आसूं, दक्षीण आनी उत्तर गोंयांतल्या खुबश्या मैदानांचेर फुटबॉल सर्तीच्या नांवा खाला ह्या कुपन्सांचो व्हड बाजार भरिल्ल्यान हाचे वरवीं लाखांनी-कोट्यांनी रुपयांची उलाढाल करता.
विशेश म्हळ्यार, फुटबॉल सर्तीच्या ब्रेकाक खेळोवपी हे हाऊझी खातीर नागरिकांची बरीच गर्दी जाता. विवीध संस्थांच्या नांवा खाला आयोजीत करपी ह्या उपक्रमांत वट्ट १ कोटी रुपयांचें पयलें इनाम दवरलां. एका कुपनाची किंमत ५०० रुपया आशिल्ल्यान खुबश्या सुवातांचेर एक हजार रुपयांक तीन तिकेट अश्या दरान विकतात. आश्चर्याची गजाल म्हळ्यार, हीं इनामां फकत फुटबॉल सर्ती खातीर नाशिल्ल्यान, कुपन्सां वरवीं मेळपी फायद्याचो वापर अनाथाश्रम, वृद्धाश्रम आनी कॅन्सराच्या दुयेतींचे मजती खातीर केल्ल्याचें भासयतात. मात ह्या नांवा खाला जावपी अर्थीक वेव्हार आनी परवान्या बगर चलपी ह्या प्रकारांचेर आतां जिल्लो प्रशासनान खर नदर दरल्या.
फाटलें वर्सभर उत्तर आनी दक्षीण गोंय जिल्लोधिकार्यांनी अशे तरेच्यो बेकायदेशीर हाऊझी आनी धिरयो आयोजनां आड खर पावलां उबारल्यांत. दक्षीण गोंयचे जिल्लोधिकारी आनी उत्तर गोंयच्या जिल्लोधिकार्यांनी विशेश आदेश जारी करून जुगार प्रतिबंधक कायद्या खाला खुबश्या सुवातांचेर छापे घातल्यात. विशेश म्हळ्यार मडगांव, कळंगूटे आनी दाबोळी वाठारांत हाऊझी आयोजना खातीर पुलीस बंदोबस्त न्हयकारून ह्या कार्यावळीं खातीर परवानगी न्हयकारिल्ली. सरकारान स्पश्ट केलां, धर्मांदाय कार्याचें नांव दिवन अशे तरेन व्हड रकमेचो जुगार खेळोवप बेकायदेशीर आसा. अशें आसतनाय, १२ एप्रिल २०२६ दिसा वार्का स्पोर्ट्स क्लब मैदानार कोट्यांनी इनामांचो लकी ड्रॉ काडपाचें जाहीर केल्ल्यान प्रशासना मुखार व्हड आव्हान उबें रावलां.
ह्या वेवसायांतले व्हड परतावे आनी फास्ट गिरेस्त जावपाचे आशेक लागून सामान्य नागरीक हातूंत भितर सरतात. रोख रकमेच्या स्वरूपांत दिवपी हीं इनामां गुन्यांवकारी प्रवृत्तीक सारें घालपाची शक्यताय आशिल्ल्यान गृह खात्यान हाचेर खर नदर दवरिल्ल्याचें निर्देश दिल्यात. ह्या प्रकरणाची खरसाण लक्षांत घेवन आतां सरकार ह्या ’डोनेशन कूपन’ संस्कृतीचेर कितें कारवाय करतलें हाचे कडेन सगल्यांचें लक्ष लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
