भांगरभूंय | प्रतिनिधी
2 मेक जात्रा; पांच दिसांत लाखांनी भावीक येतले भेटेक, प्रशासन सज्ज
भांगरभूंय । प्रतिनिधी
दिवचल : लाखांनी भाविकांचें श्रद्धास्थान आशिल्ली श्री लईरायदेवीची जात्रा 2 मे ह्या दिसा जातली. उपरांत फुडले पांच दीस लाकांनी भावीक गांवांत येवन देवदर्शन घेतले. जात्रे खातीर शिरगांव पुराय सज्ज जालां. जात्रे दिसा फांतोडे सावन व्हड संख्येन भावीक गांवांत येवपाक सुरवात जाता. दीसभर वेगवेगळे धर्मीक विधी जातात. मध्यानरातीर हजारांनी धोंड भगभगपी होमखणांतल्यान वचून अग्नीदिव्य करतात. दुसऱ्या दिसा सावन चार दीस कौलां जातात. जात्रेची तयारी निमाण्या पांवड्यार पावल्या.
प्रशासना वतीन पांच दीस पुलीस बंदोबस्त आनी हेर सुविधा दिवचे खातीर बसकां घेतल्यात. सगळे तरेची तयारी केल्या. जात्रेक भाविकांची संख्या सुमारा भायर जाता, हे खातीर लोकांनी शिस्त पाळून देवदर्शन घेवचें. गाडयो मेळत थंय पार्क करून लोकांक येरादारी खातीर त्रास जावचो ना, हाची जतनाय घेवची, देवस्थान अध्यक्ष दीनानाथ गांवकार हांणी मागलां.
बिरेस्तारा सांज मेरेन अग्नीदिव्या खातीर होमखण दाळून तयार जातलें. एकवत धरिल्ले धोंड जंय जंय रावल्यात तांचे कडेन वचीन राष्ट्रीय किर्तनकार सुहास वझे नामजप करून सात्विकता वाडयतात. फाटलीं कितलीशींच वर्सां तांचो हो उपक्रम चालू आसा.
उत्तर गोंय पुलीस अधिक्षक अक्षत कौशल हांणी विवीध खात्यांची बसका घेवन जात्रे निमतान पांच दीस खर पुलीस बंदोबस्त, येरादारी वेवस्था तशेंच भावकांचे सुरक्षे संबंदांत चर्चा केली. बसकेक उपअधिक्षक जिवबा दळवी, निरिक्षक गडेकार तशेंच येरादारी, रस्तो, वीज, उदक आनी विवीध खात्यांचे अधिकारी, देवस्थान समितीचे सगळे पदाधिकारी हाजीर आशिल्ले.
जात्रे निमतान शिरगांवां खर पुलीस बंदोबस्त आसतलो, तशेंच ड्रोनाचो वापर करून नदर दवरतले, अशी बसकेंत म्हायती दिली.
अस्नोडें ते शिरगांव हो रस्तो भाविकांनी पुराय भरता. ताका लागून गाडयो वेवस्थीत दवरचे खातीर पार्कींगची वेवस्था केल्या. हे जात्रेंत मोगरेच्या कळ्यांचो वेवसाय लाखांनी रुपयांची उलाढाल करता. फुडले कांय दीस मोगऱ्यांचो परमळ पुराय शिरगांवांत परमळटलो. जात्रा प्लास्टीक मुक्त करचे खातीर शिरगांवच्या सरकारी मुळाव्या शाळेच्या भुरग्यांनी 2 हजार कागदी पोतयो तयार केल्यात. ह्या कामांत तांकां शिक्षक आनी पालकांनी मजत केल्या.
गोबी मंच्युरी स्टॉलांक बंदी देवस्थान समितीन कांय दिसां आदीं अन्न आनी वखदां प्रशासनाक शिरगांव जात्रेंत गोबी मंच्युरीचेर बंदी घालपा संबंदांत निवेदन सादर केलां. ताका सगळ्यांनी पाळो दिवचो. कसलेय तरेचो गोबी मंच्युरीचो स्टॉल घातलो जाल्यार ताचेर कारवाय करपाचे आदेश प्रशासनान दिल्यात, अशें दीनानाथ गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
