भांगरभूंय | प्रतिनिधी
विनोदा भायर, पिळगेचो संघर्श, समाजीक दर्जो, पालकांची अपेक्षा आनी गिरेस्तकाय हांचे मदलो फरक ह्या अर्थपूर्ण विशयांकय ह्या नाटकांत स्पर्श केला.
दरवर्सा गोंयांत पन्नास एक नव्या कोंकणी नाटकांची भर पडटा. तातूंत स्वतंत्र म्हणपा सारकीं एका हाताच्या बोटार मेजपा इतलींच नाटकां आसतात. ह्याय वर्सा एक नाटक सगळ्यांची नदर ओडून घेता. ते म्हटल्यार ‘लंडन रिटर्न्स.’ सदचे वरीं उत्सवी रंगमाचयेर खेळपी नाटक करीनासतना एक टेक्निकली एडवान्सड अशें नाटक राजदीप नायक हांचे कलाचेतना वळवय हे नाट्यसंस्थेन माचयेर हाडलां. मोहन नायक आनी निगम नायकाची निर्मिती आशिल्ल्या ह्या नाटकाचें लिखाण ज्येश्ठ नाटककार सम्राट बोरकार हांणी केलां. ही संहिता पारंपरीक नाटक- तियात्र शैलीच्या विनोदाच्यो शिमो पुसट करता आनी कृत्रीम बुद्धीचो आस्पाव करून कोंकणी रंगमाचयेक एक नवो आयाम जोडटा.
मुळांत लंडन रिटर्न्स ही एक वेगान चलपी अशी विनोदी नाटक संहिता आसून तातूंत प्रहसन, विनोद, समाजीक व्यंग्य आनी आधुनीक तंत्रीक विशय उल्लेखनीय पद्दतीन मांडला जो फकत मनरिजवण करपा पुरतोच मर्यादीत उरनासतना आमी जगतात त्या काळा कडेन संबंद जोडटा. आनी अशें हें नाटक सुयोग्यरित्या दिग्दर्शक अमोघ बुडकुले हांणी बसयलां.
हें नाटक बाप्पो ह्या मुखेल पात्रा भोंवतणीं घुंवता. स्वता विशीं फटी मिजास आनी प्रतिश्ठेचो वेस आशिल्ल्या बाप्पोक आपली धूव महिषासुर्वर्धिनी, हिचे खातीर लंडनांतलो गिरेस्त जांवय जाय आसता. आनी हे सगळें जमयतना मध्यमवर्गीय बापायची कशी फटफजिती जाता हाचें उदाहरण म्हणल्यार हें नाटक.
नाटकाची सुरवात सुत्रधाराच्या संवादान जाता आनी हांगाच खंय तरी जाणवता की नाटक आगळें वेगळें आसा. संवाद, विनोदी वन-लायनर, आनी शाब्दीक कोटी, नाटकाक उंचेल्या पांवड्यार व्हरता. त्या भायर लोखंडीची दुबावीत उपस्थिती आनी दर एका गजालीन करपी अतिताय, पोपटलालाचीं सवंग व्यंगचित्रां सुरवातेक प्रेक्षकांक गुंतून एक नाटकी वातावरण तयार करता.
पूण लंडन रिटर्न्सांतलें सगळ्यांत चड नदरेक पडपी घटक म्हणल्यार तातूंत खेळयल्लो “देसी ए.आय.” हें पात्र! ही काल्पनीक कृत्रीम बुद्धी प्रणाली, लोकांच्या डिजिटल जिविताचें विनोदीपणान विश्लेशण करता. हें एआय पात्र नाटकांत आधुनीक तंत्रीक मोडण हाडटा, सोशल मिडिया, मोबायल फोन आनी डिजिटल पांयचिन्न दिसपट्टे जिणेंत कितले खोलायेन घुसपल्यात तें उक्ते करता. एआयच्या मनोरंजक निरिक्षणांतल्यान, लेखक आधुनीक डिजिटल वागणुकेक, इंस्टाग्राम वेसन ते ऑनलायन अस्मिताय मेरेन उपदेशात्मक आवाज करीनासतना व्यंग्य करपाक येशस्वी थारता.
पारंपरीक माचये वयल्यान थाराविक फास्केंत मांडिल्लो विनोदाचो विशय ह्या नाटकांत ना, देखून हें नाटक पळयतना एक वेगळीच अनुभूती येता. कोंकणी नाटक फकत माय सुनेचीं झगडीं, भेस बदलपी पात्रां वा सदचेवरीं गांवगिऱ्या परिस्थितींत मर्यादीत उरना. आपली संस्कृतीक रूच तिगोवन दवरून आधुनीक संकल्पनांचो आत्मविस्वासान सोद घेवंक शकता हें तातूंतल्यान दिसून येता.
विनोदा भायर, पिळगेचो संघर्श, समाजीक दर्जो, पालकांची अपेक्षा आनी गिरेस्तकाय हांचे मदलो फरक ह्या अर्थपूर्ण विशयांकय ह्या नाटकांत स्पर्श केला. माही आनी अर्जुन हांचे मदलो रोमान्टिक ताण नाटकाक एक वेगळेंच वळण दिता.
संस्कृतायेंत रुजून रावूनय नाटक विकसीत जावंक शकता हें ह्या नाटकाचे प्रस्तुतकर्ते मोहनदास नायक लंडन रिटर्न्स च्या निमतान सिद्ध करतात. पारंपरीक हास्य कथनांत कृत्रिम बुद्धीची वळख करून दिवन ताणें कोंकणी माचयेर निर्मिती खातीर एक नवी सृजनशील शक्यताय उक्ती केल्या. कमर्शीयल नाटकांनी अशें तरेच प्रयोग करप हेंच मुळांत धाडसी पावल. आनी ही सगळी तांत्रीक बाजूची किमया हाताळ्ळ्या निगम नायक हाणें. नाटक उंचेल्या पांवड्यार व्हरपाक आनी जैतीवंत करपाक ताचो सगळ्यांत मोलादीक हातभार आसा.
नाटकांत वांटो घेवपी कलाकार आसात, चंद्रानन नायक, मोहन नायक, सत्यजीत मुळी, अभिला कवळेकार आनी विपुल सावंत. जें उर्जेन आनी कल्पनेन नाटक बरयलां तेच उर्जेच्या आनी कल्पनेच्या पांवड्यार हे कलाकार ही कलाकृती माचयेर सादर करतात. ह्या नाटकांत एक देखदिणो संदेश आसा, जो सध्याक गोंयभर गाजता. ताचे एकाअर्थी चित्रीकरण ह्या नाटकांत दाखयला आनी हें जर अशेंच चल्लें जाल्यार आमचो फुडार कितें जातलो हेंय आमकां नाटक दाखोवन दिता. हें नाटक जितलें मनोरंजकआसा तितलेंच तें विचार करपा सारकेंय आसा.
नाटकाचे एक बळगें ताच्या लेखन शैलींत आसा. नाटकाची तांत्रीक बाजू ह्या तंत्रज्ञांनी हाताळ्ळ्या : नेपथ्य- शंकर नायक, संगीत- सचीन मांद्रेकार, उजवाडा येवजण- हनुमंत नायक, आवाजा येवजण- खेमराज नायक, माची मांडावळ- गौतम पालकार आनी मनोहर तारी, भेसवण- प्रशांती च्यारी, पब्लिसीटी डिझायन- निगम नायक, खास आधार- संजू नायक, गौतम नायक, राहुल मेस्त्री आनी कवळे ग्रामपंचायत.
गोंयभर नाटकाचे प्रयोग चालू आसात. मनांत ध्यास आनी विचारांत विश्वास आसल्यार एके वेगळे आधुनीक शैलीचें नाटक आमी गोंयकार कोंकणी भाशेंत निर्माण करपाक शकतात आनी मळबाक गवसणी घालपाक शकतात, हेंच ह्या नाटकाचें जैत. मुखारल्या प्रवासांत नाटकाचे हेर भाशांनी अणकार जावन गोंयची शीम हुपपाचो हावेस हें नाटक बाळगीता.
– पियूष नायक
88301 75519
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
