भांगरभूंय | प्रतिनिधी
चवथी यत्तेचे शाळेचो वर्ग सुरू आशिल्लो.
“फाल्यांच्यान तुमकां चवथीची सुटी. गणपती विसर्जन जातकच कितें करतलीं?” निरंजन सरान विचारलें.
“हांव जाल्यार नुस्तें गोरोवंक वतलों. दोन दीस सुक्यार वतले न्ही सर?” अजयान सांगलें.
“हांव अजयाची पोती धरूंक वतलों. काम करिनासतना वांटो मेळटलो.” पंकून सांगलें. पंकू वर्गांतलो सगळ्यां परस मस्तो भुरगो. नाका जाल्लें करप आनी उलोवप हो ताचो छंद.
“ओग्गी बस थंय. म्हजे बराबर तूं नाका.” अजयान ताका धेंगसो घालो.
“जाल्यार हांव येतां तुजे बराबर. गरयल्लें नुस्तें खूब घोस्तान खातां हांव.” पंकूचे कुशीक बशिल्ल्या लंकून म्हणलें. ते दोगूय नाड इश्ट, केन्ना कितें करीत ताचो नेम ना. ताकाय अजयान नाकारलो.
“तुमी कितें करतलीं?” सरान चलयांक विचारलें.
“सर, घरांत सगळें टाक-टीक आसल्यार म्हाका आवडटा. हांव नितळसाण करतलें.” सुनितान म्हणलें.
“आमगेरूय एक दीस यो मुगो.” लंकून ताचीं फकांडां केलीं.
“आमगेर आयलें जाल्यार हांव तुका म्हातारेचे केंस खावयतलों.” पंकून सांगलें.
“तुजेच खावय मरे. म्हातारेचे कित्याक?” सुनिताची जाप आयकून सगळीं भुरगीं हांसलीं.
“चवथीच्या सुटयां विशीं एक बरोसो निबंद बरयात.” सरान तांकां घरा कडेन करूंक अभ्यासूच दिलो.
“सुटयां दिसांनी कितें कितें केलें तें सगळें बरोवपाचें सर? म्हणल्यार नुस्त्याची पोती धरूंक गेलो तें पासून?” लंकून विचारलें. भुरगीं परत एक फावटीं हांसलीं.
“कोण बरें निबंद बरयता ताका इनाम मेळटलें.” सरान घोशणा केली. तितल्यान मदले सुटयेची घांट वाजली आनी सर गेलो. ताचे फाटाफाट सगळीं भुरगीं बोवाळ मारीत भायर सरलीं, सोडून लंकू आनी पंकू.
लंकून बेगिबेगीन दार बंद केलें आनी पंकू आपणालें बेग घेवन दारा कडेन आयलो. तातूंतली एक घुटलायल्ली पोती काडून लंकू कडेन दिली आनी चिंतिल्लें तशें जातलें हाची खात्री जातच दार बंद करून तो भायर गेलो. मदली सुटी सोंपून भुरगीं वर्गांत भितर वचूंक सोदी, पंकून तांकां आडावन दवरलीं आनी लंकू कडल्यान शिनाल मेळटच भितर वचूंक दिलें. सुनितानूच दार उगडलें आनी सगळीं भुरगीं वर्गांत भितर सरूंक लागलीं. तांचेर एकदम चॉकलेटींचो पावस पडूंक लागलो.
विन्सी क्वाद्रूस
मो : 9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
