लंकाधिपती रावण : अरविंद त्रिवेदी

भांगरभूंय | प्रतिनिधी

जरी अरविंद त्रिवेदीन रावणाची भुमिका रंगयतना टिव्हीचेर रामा आड झुज दिलें, तरी वास्तवांत तो निस्सिम रामभक्त आशिल्लो.

मैं लंकाधिपती रावण……1987 वर्सा ‘रामायण’ माळेंतल्या रावणाच्या भुमिकेंतल्या अरविंद त्रिवेदीली ही गर्जना कोण विसरूंक शकता? रामानंद सागराले गाजिल्ले हे माळेंत लंकेश अर्थात रावणाचें पात्र साकारपी त्रिवेदीचो आवाज जेन्ना प्रतिध्वनीत जातालो तेन्ना भिरांतेन पळोवप्यांच्या आंगार कांटो उबो रावतालो. अरुण गोविलाक राम म्हणून अज्रंवर लोकप्रियता मेळ्ळी जाल्यार अरविंद त्रिवेदीन रावणाची भुमिकाय याद उरपा सारकी केल्ली. अभिनयाचे नदरेन पळयल्यार अरुण गोविलाच्या रामा परस अरविंदान प्रभावीपणान साकारिल्लो रावण प्रेक्षकांनी चड उखलून धरिल्लो. उपरांत आयिल्ल्या रामायणा वयल्या माळांनी बरेच कलाकार अरविंद त्रिवेदी भशेन रावणाच्या पात्राची नक्कल करपाचो यत्न करतना दिसले. 

 इडर कुकडिया गांवांतलो मूळ रावपी आदलो खासदार अरविंद त्रिवेदी हाचो जल्म मध्य प्रदेशांतल्या उज्जैन शारांत एका गुजराती कुटुंबांत 8 नोव्हेंबर 1938 दिसा जाल्लो. ताणें  मुंबयच्या भवन महाविद्यालयांत इंटरमीडिएट पांवड्या मेरेन शिक्षण घेतलें. 4  जून 1966 दिसा ताचें लग्न नलिनी हिचे कडेन जालें. ताका तीन चलयो. ताचो भाव उपेंद्र हो गुजराती चित्रपटांचो सुपरस्टार आशिल्लो. अरविंदाच्या अभिनय प्रवासाची सुरवात गुजराती नाटकांनी जाल्ली. फुडें ताणे जायत्या येसस्वी गुजराती चित्रपटांनी भूमिका केल्यो. ‘पराय धन’, ‘आज की ताजा खबर’ ह्या हिंदी फिल्मांनीय मागीर काम केलें. हिंदी- गुजराती चित्रपटां सयत ताणें नाटकांनी आनी टिव्ही माळांनीय अभिनय केलो. गुजराती चित्रपटांत भीष्म पितामहाचो मान ताका मेळिल्लो. पूण, अरविंदाक खरी प्रसिद्धी 1987 वर्साचे ‘रामायण’ माळेंतल्यान  मेळ्ळी.

अरविंद त्रिवेदी हाणें 300 गुजराती आनी हिंदी चित्रपटांनी अभिनय केला. गुजराती धर्मीक आनी समाजीक चित्रपटांनी ताका लोकप्रियता मेळ्ळी. थंय ताणें 40 वर्सां योगदान दिलें. उत्कृश्ट अभिनया खातीर अरविंद त्रिवेदीक सात गुजरात राज्य पुरस्कार मेळ्यात. 2002 वर्सा केंद्रीय फिल्म प्रमाणीकरण मंडळाचो (सीबीएफसी) कार्यवाह अध्यक्ष म्हणून तागेली नेमणूक केल्ली. 20 जुलय 2002 ते 16 ऑक्टोबर 2003 मेरेन तांणी तें काम सांबाळ्ळें. 

जरी अरविंद त्रिवेदीन रावणाची भुमिका रंगयतना टिव्हीचेर रामा आड झुज दिलें, तरी वास्तवांत तो निस्सिम रामभक्त आशिल्लो. रामायण टीव्ही माळ काबार जातकूच ताणें चित्रीकरणा मजगतींच्यो यादी जागयतना सांगिल्लें, ‘रामायण माळेंत हांव जेन्ना रामा आड खर उतरांचे संवांद म्हणटालो, तेन्ना उपरांत देवाची माफी मागतालों. हें चालूच आसतालें’. कोरोन लॉकडावनाच्या काळांत दूरदर्शनाचेर रामायण माळ परतून प्रसारीत जाल्ली तेन्ना अरविंद त्रिवेदी रामायण पळयतना अरुण गोविल रामाचे भुमिकेंत पडद्याचेर दिसतालो तेन्ना ताका हात जोडून नमस्कार करतालो. 1987 त टिव्ही मुखार बसून प्रेक्षक लेगीत रामाचे भुमिकेंत अरुण गोविलाक पळोवन ​​पुजा, जयजयकार करताले, हें आयचे पिळगेक सांगल्यार ते अजापित जातलें. 2020 वर्सा प्रसार माध्यमां कडेन उलयतना अरविंद त्रिवेदी आपलो चडसो वेळ देवभक्तींत घालता अशें ताच्या घरच्यांनी सांगिल्लें. सिनेमा वांगडाच त्रिवेदीचो राजकारणा कडेन संबंद आशिल्लो. लोकप्रियता तेंगशेर पाविल्ली तेन्ना ताणें 1991 वर्सा गुजरातच्या साबरकांठा मतदारसंघात भाजपाचे तिकेटीचेर वेंचणुकेंत जैत जोडिल्लें. अरविंद त्रिवेदी हाका 48.28% म्हणल्यार वट्ट 168704  मतां मेळ्ळीं. दुसरे सुवातेर जदयू उमेदवार मगनभाई मणिभाई पटेल हांकां 37.86 टक्के मतां (132286 मतां) मेळ्ळीं. वेंचणुकेंत वट्ट 20 उमेदवार आशिल्ले आनी तीन उमेदवार सोडल्यार सगळ्यांक 01 टक्क्यां परस उणीं मतां मेळ्ळीं. त्या वेळार अरविंद त्रिवेदीचे रॅलींनी चड गर्दी आसताली. लोक पयसूल्यान ताका पळोवंक चलत येताले. तांकां रावणाचे संवाद म्हणपाक सांगताले. विरोधकांनी मतां फोडपा खातीर ते वेंचणुकेंत अरविंद त्रिवेदी आड आनीक दोन त्रिवेदी आडनांवाचें उमेदवार उबे केल्ले, पूण लंकेशान व्हड भोवमतान जैत मेळयलें. 1991 ते 1996 मेरेन तो लोकसभेचो खासदार आशिल्लो. मजेची गजाल म्हणल्यार त्या काळांत अरविंद आपल्या नांवा परस लंकेश ह्या नांवान चड नामनेक पावलो. वेंचणुके संबंदीत दस्तावेजांतय ताचें नांव अरविंद त्रिवेदी (लंकेश) अशें बरयल्लें. अरविंद जाण्टे पिरायेंत खूब दुयेंत आशिल्लो. 82 वर्सां पिरायेचेर मंगळार  6 ऑक्टोबर 2021 चे रातीं काळजाचो आताकान कांदिवली- मुंबयंत ताका मरण आयलें.

————————————-

सुदिन वि. कुर्डीकार