भांगरभूंय | प्रतिनिधी
जून म्हयन्यांत सुरू जावपी संवसारीक टी-20 क्रिकेट सर्ती खातीर रोहीत शर्मा भारताच्या पंगडाचो मुखेली आसतलो अशी घोशणा भारतीय क्रिकेट नियामक मंडळाचे (बीसीसीआय) सचीव जय शाह हांणी केली.
पोरूं जाल्ले संवसारीक वन डे क्रिकेट सर्तीचे फायनलींत आमकां हार घेवची पडली आसली तरी फायनली पयलीं सेगीत 10 मॅची जिखून क्रिकेट मोग्यांक खोस मनोवपाक संद दिल्ली. जून म्हयन्यांत सुरू जावपी संवसारीक टी-20 क्रिकेट सर्त रोहीत शर्माच्या फुडारपणा खाला भारत जिखतलो अशी आस्त आसा अशें एके कार्यावळींत उलयतना जय शाहान म्हणलें.
आयोजीत केल्ले कार्यावळींत एससीएस स्टेडियमाचें नांव बदलून निरंजन शाह स्टेडियम अशें केलें. हेच कार्यावळींत जय शाहान रोहीत शर्माच मुखेली आसतलो हाची घोशणा केली. कार्यावळीक रोहीत, मुखेल प्रशिक्षक राहुल द्रविड आनी निवड समितीचे अध्यक्ष अजीत आगरकर उपस्थीत आशिल्लो.
इंडियन प्रिमियर लिगेंतलो पंगड मुंबय इंडियन्सान कांय म्हयन्यां पयलीं रोहीत शर्माक मुखेलपदा वयल्यान काडून हार्दीक पांड्याक ही जापसालदारकी दिल्ली. तेन्ना सावन अंदूं जावपी संवसारीक टी-20 सर्ती खातीर रोहीताक मुखेली करपाक शकता अशी चर्चा आशिल्ली.
नोव्हेंबर 2022त जाल्ले संवसारीक टी-20 सर्तींत भारताक सेमी फायनलींत हार घेवची पडिल्ली. तेन्ना सावन हार्दीक पांड्यान चडश्या टी-20 मॅचींनी भारताचें फुडारपण केल्लें. पूण, रोहीत आनी विराट कोहली हांकां जानेवारींत अफगाणिस्ताना आडचे माळे खातीर दोगांयचो पंगडांत आस्पाव केल्लो. तेन्ना सावन ते दोगूय संवसारीक टी-20 सर्तींत खेळटले अशी चर्चा जाल्ली.
पांड्या सध्या दुखापतीक लागून बंगळुरूच्या राष्ट्रीय क्रिकेट अकादमींत रिहॅब करीत आसा. पोरूं जाल्ले संवसारीक वन डे क्रिकेट सर्तींत बांगलादेशा आड खेळटना पांड्याक दुखापत जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
