भांगरभूंय | प्रतिनिधी
रोहीत शर्मा, विराट कोहली, आर आश्विन आनी जसप्रीत बुमरा हे 5 सप्टेंबरा सावन सुरू जावपी दलीप ट्रॉफींत खेळचे नात. हे सर्ती खातीर खेळगड्यांची निवड ह्या म्हयन्याचे अखेरेक जातली. पूण, भारतीय क्रिकेट नियामक मंडळा (बीसीसीआय) कडेन केंद्रीय कबलात केल्ले हेर खेळगडे वांटो घेतले.
फुडल्या पांच म्हयन्यांनी भारताक 10 टॅस्टी खेळपाच्यो आसात. ताका लागून सिनीयर खेळगड्यांक विसव दितले. हे सर्तींत फकत लोकेश राहुल आनी ऋषभ पंत हे लेगीत वांटो घेवपाक शकतात. दुखापतीक लागून लोकेश राहुलाक वर्साचे सुरवातीक आयोजीत केल्ली इंग्लंडा आडची टॅस्ट माळ चुकिल्ली. जाल्यार डिसेंबर 2022त मोटार अपघातांत जखमी जाल्लो पंत तांबड्या बॉलान अजून मेरेन खेळूंक ना.
शुभमन गील, यशस्वी जयस्वाल, सरफराज खान, सूर्यकुमार यादव आनी रजत पाटीदार हे वांटो घेतले.
फास्ट बॉलर मोहम्मद शमी लेगीत खेळपाची शक्यताय आसा. दुखापतीक लागून तो फाटल्या साबार म्हयन्यां सावन क्रिकेट मैदाना पसून पयस आसा. सध्याचो पुर्ण तंदुरुस्त जावपाचे वाटेर आसा. सर्तींत वांटो घेवन आपली तंदुरुस्ती सिद्ध करपाची संद ताचे कडेन आसा.
केंद्रीय कबलात केल्ल्या खेळगड्यांक देशांतर्गत क्रिकेट सर्तींनी खेळपाक जाय ना जाल्यार तांचेर खर कारवाय जातली अशें कांय म्हयन्यां पयलीं बीसीसीआयचो सचीव जय शाहान म्हणिल्लें.
दलीप ट्रॉफी आदीं झोनल सर्तीच्या रुपान खेळयताले. पूण, हे खेपे भारताचो आदलो प्रशिक्षक राहुल द्रविड, राष्ट्रीय क्रिकेट अकादमीचो अध्यक्ष व्ही व्ही एस लक्ष्मण, निवड समितीचो अध्यक्ष अजीत आगरकर आनी बीसीसीआयचो वांगडी एबे कुरुविला हांचो आस्पाव आशिल्ले समितीन सर्तींत कांय बदल करपाक सांगिल्ले. ते उपरांत सर्तींत कांय बदल केल्यात.
चार पंगडांचो आस्पाव आशिल्ले हे सर्तींत दरेक पंगड रावण्ड रॉबिनाच्या आदाराचेर तीन मॅची खेळटले. गुणांच्या आदाराचेर पयली सुवात मेळोवपी पंगडाक जैतिवंत घोशीत करतलो.
मजगतीं, भारत अंदूंच्या हंगामांतली पयली टॅस्ट 19 सप्टेंबराक चेन्नय शारांत बांगलादेशा आड खेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
