भांगरभूंय | प्रतिनिधी
पणजी : सोमारा पणजी महानगर पालिकेच्या महापौर पदार रोहित मोन्सेरात आनी उपमहापौर पदी वसंत आगशीकर हांची विरोधाविणें निवड जाली. सेगीत सवे फावट महापौर जावन रोहित हांणी इतिहास रचला. महापौर पदाचे कार्यावळींत पणजेची समस्या सोडोवपाचो आनी वेंचणूक काळांत दिल्लीं आस्वासनां पुराय करपाक प्राधान्य दितलों अशें तांणी सांगलें. त्यान पयलीं नव्या वेंचून आयिल्ल्या नगरसेवकांनी आपल्या पदाची सोपूत घेतलो.
पणजेचे जनतेन आपल्या परत वेंचून हाडून कामां करपाची संद दिल्या. फाटल्या काळांत उरिल्लीं कामां पुराय करपाचेर भर दितलों. पे पार्कींग, येरादारी कोयंडी हाका प्राधान्य दितलों. येरादारी कोयंडी विशीं आमी येरादारी पुलिसांक मेळ्ळ्यात. कोयंडी उणी करपा विशीं कितें करपाक मेळटलें हे विशीं पुलिसां कडल्यान आमी शिफारस मागल्या. फुडल्या स म्हयन्यांत ही समस्या उणी करपाचे आमी यत्न करतात, अशें रोहित हांणी सांगलें.
आमी सुरवातेच्या टप्प्यांत कॅसिनो लागसारच्या वाठारांत येरादारी कोयंडी जावची न्हय म्हूण यत्न करतले. शारांतली मुखेल समस्या टप्प्या टप्प्यांनी सोडोवपाचेर भर दितले. सध्या स्मार्ट सिटीचीं कामां पुराय जाल्यांत. अशें आसतनाय पीएनजी खातीर परत रस्ते खणपाच्या आड आमी आसात. मात हे खातीर हेर कांय उपाय येवजण्यो करपा विशीं आमी विचार करतले. सध्या आमी पणजेच्या सामान्य जनतेक प्राधान्य दितले अशें रोहित हांणी स्पश्ट केलें.
त्यान पयलीं महापालिकेच्या विवीध समित्यांची निवड जाली. स्थायी समितींत रोहित मोन्सेरात,
विठ्ठल चोपडेंकार, रुपेश हळर्णकार, उदय मडकयकार, कबीर मखिजा आनी निकिता नायक हांणी निवड केली. बाजार समितींत कॅरोलिना पो, अस्मिता केरकार, किशोर शास्त्री, किर्ती सांखळकार, सिल्वेस्टर फर्नांडीस, विद्या गडकार, भौशीक बांदकाम समितींत शुभम चोडणकार, प्रसाद आमोणकार, करण पारेख, युतिका झांबावलीकार, वर्षा शेट्ये आनी तुकाराम चिन्ननावर हांची निवड केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
