भांगरभूंय | प्रतिनिधी
उपमहापौर पदाचेर संजीव नायक
पणजी ः पणजी महापौर पदाचेर रोहित मोन्सेरात आनी उपमहापौर पदाचेर संजीव नायक हांची आयज विरोधा विणें निवड जाली. बुधवारा महापालिकेत जाल्ले खाशेले सभेंत आयुक्त क्लेन मदेरा हांणी ही घोशणा केली. ह्या पदां खातीर हेर कोणेच अर्ज करूंक नाशिल्ल्यान दोगांचीय विरोध विणें निवड जाल्ल्याचे मदेरा हांणी सांगलें. रोहित मोन्सेरात हांची पांचवे खेपे महापौर पदाचेर आनी संजीव नायक हांची चवथे खेपे उपमहापौर पदाचेर निवड जाल्या.
रोहित हांणी सांगलें, म्हाका तेंको दिल्ल्यान पणजेचे लोक आनी नगरसेवकांचे हांव उपकार मानतां. आमच्या कार्यकाळांत आमी पणजेचे वेगवेगळे प्रस्न सोडोवपाचो यत्न केला. तशेंच हाचें फुडेंय पणजेकांरांच्यो समस्या सोडयतलो. सध्या पणजेंत स्मार्ट सिटीची कामां ही एक व्हडली समस्या. तांची मुजत सोंपपाक लागला. वेळार काम करुन शारा भायर सरचे अशें आमकां दिसता.
शारांत भिकाऱ्यांचो आंकडो वाडत आसा. हाचेर आमी लक्ष दिवपाची गरज आसा. नगरपालिका कार्यालय हेर कडेन व्हरपाक सुवात नाशिल्ल्यान नव्या इमारतीचो प्रस्नूय प्रलंबीत आसा. पणजी बाजारपेठेचो प्रस्नूय बेगीन सुटावो जातलो. पावसा पयलींची कामां पालिका म्हामंडळा वतीन चालू आसात. आयज स्मार्ट सिटी आनी भौशीक बांदकाम खात्यां कडेन बसका जातली. कांय कडेन घाणयाऱ्या उदकाची लायन जोडूंक नाशिल्ल्याची कागाळी आयल्या. हे आनी हेर मुद्दे हे बसकेंत मांडटले.
हाचे आदीं महापालिकेच्या वेगवेगळ्या समितींची निवड केली. स्थायी समितींत रोहित मोन्सेरात, हांचे सयत आस्मिता केरकार, करण पारेख, विठ्ठल चोपडेकार, कॅरोलिना पो आनी नरसिंह मोरजकार हांचो आस्पाव आसा. भलायकी आनी बाजार समितींत बेंटो लोरेना, लोरियन डायस, संतोष सुर्लीकार, अदिती चोपडेंकार, शुभदा शिरगांवकार आनी प्रसाद आमोणकार हांचो आस्पाव आसा. बायलां आनी बाल कल्याण समितींत सेंड्रा कुन्हा, दीक्षा माईणकार हांचो आस्पाव आसा.
आयज पार्किंगा संबंदी पळोवणी
स्मार्ट सिटीच्या कामाक लागून सध्या शारांत पार्किंगा खातीर सुवात मेळना. जिल्होधिकाऱ्यांनी शारांत टॅक्सी पार्किंगाचेर बंदी घाल्या. हाका लागून थळाव्या लोकांक आपल्यो गाडयो पार्क करपाक सुवात मेळटली. शारांतल्यी पार्किंग आनी हेर येरादारीच्या समस्यां संबंदी येरादारी खातें आनी येरादारी पुलीस आयज पळोवणी करतले अशें मोन्सेरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
