भांगरभूंय | प्रतिनिधी
पणजी: गोंय जमीन हडप प्रकरणांतलो मुखेल सुत्रधार रोहन हरमलकार हाचे आड सक्तवसुली संचालनालयान (ईडी) व्हड कारवाय केल्या. न्यायनिर्णय प्राधिकरणान तात्पुरते जप्तीचे आदेश कायम केले उपरांत, ईडीच्या पणजी विभागीय कार्यालयान मनी लॉंड्रिंग प्रतिबंधक कायदो, 2002 खाला गोंयच्या 15 सुवातांवेल्या मालमत्तांचो ताबो घेतला. 19 सप्टेंबर 2025 दिसा जारी केल्ल्या नोटिसी प्रमाण जप्त केल्ले मालमत्तेंत हणजूण, आसगांव, पर्रा, निल्ला, कळंगूटे, वेर्णाच्यो जमनी तशेंच मडगावचे एके सदनिकेचो आसपाव आसा.
नेमकें प्रकरण कितें?
म्हापशें पुलिसांनी रोहन हरमलकारा आड जमीन हडप प्रकरणांत दोन गुन्यांव दाखल केल्ले. ताचो तपास उपरांत विशेश तपास पंगडा कडेन (एसआयटी) वर्ग केलो. मनी लॉन्ड्रिंगचो दुबाव आयिल्ल्यान ईडीन 24 एप्रिलाक हरमलकर हाचे मालमत्तेचेर छापो घातलो. तेन्ना तांकां 1 हजार कोटीं परस चड बाजारमुल्ल्याचे जमिनींचीं बनावट कागदपत्रां आनी 600 कोटीं परस चड किमतीच्या मालमत्तांची मूळ कागदपत्रां जप्त केलीं. 3 जुनाक हरमलकार हाका अटक केली. तांचेर अल्कांत्रो डिसोझा आनी हेरां सयत कट रचून 212.85 कोटी रुपयांची मालमत्ता मेळयिल्ल्याचो आरोप आसा. ह्या मालमत्ता मदल्या 15 मालमत्तांचो ईडीन ताबो घेतला.
ईडीने ह्या मालमत्तांची चवकशी केली तेन्ना ह्यो 15 मालमत्ता वेगवेगळ्या न्यायालयां कडल्यान ‘इन्व्हेंटरी सिडिंग’ वरवीं मेळयिल्ल्याचें मुखार आयलें. संबंदीत मालमत्तांच्या कागदपत्रांचेर खुबश्या मनशांचीं नांवां आसलीं तरी ते मनीस बनावट आशिल्ल्याचो दुबाव ईडीन उक्तायला. ह्या 15 मालमत्तांतल्यान हरमलकाराक सुमार 29.24 कोटी रुपयांचो ‘गुन्यांवांतल्यान मेळिल्ले पयशे’ मेळिल्ल्याचें तपासांत मुखार आयलें.
हे कारवाये उपरांत, ईडीन जाहीर नोटिशीं वरवीं संबंदीतांक 15 दिसांनी ह्या मालमत्तांचेर खंयचोय दावो आसल्यार तो सादर करपाचे निर्देश दिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
