भांगरभूंय | प्रतिनिधी
ईडीची म्हापशेंच्या विशेश न्यायालया कडेन मागणी
भांगरभूंय । प्रतिनिधी
पणजी : जमीन हडप प्रकरणांतलो मास्टरमायंड रोहन हरमलकार हाच्या संबंदांत केल्ल्या तपासा वेळार ताणें 100 कोटीं परस चड रकमेचीं मालमत्ता गुन्यांवांतल्यान मेळयल्या अशें कळ्ळां. जसजशी चवकशी फुडें वतली तसतशी गुन्यांवांतल्यान मेळयल्ले मालमत्ता रकमेचें प्रमाण शेंकड्यांनी कोटींनी पावतलें. ते भायर ताच्या बँक खात्यांत आशिल्ले 1 कोटी रुपया गोठयल्यात. अशी म्हायती दिवन ताचो जामीन भायर मारपाची मागणी सक्त वसुली संचालनालयान (ईडी) म्हापशेंच्या विशेश न्यायालयांत केल्या.
रोहन हरमलकाराच्या विरोधांत म्हापशें पुलीस स्टेशनार दोन गुन्यांव दाखल केल्ले. दोनायचो तपास एसआयटीन केलो. मजगतीं, वयल्या गुन्यांवांत मनी लॉण्ड्रींगचो दुबाव आशिल्ल्यान ईडीन कारवाय सुरू केली. ईडीन 24 एप्रील 2024 ह्या दिसा हरमलकार हाच्या पिळर्ण, पर्वरी, दिवाडी आनी हेर वाठारांतल्या मालमत्तांचेर धाड घालून एक हजार कोटीं परस अदीक बाजारमोल आशिल्ल्या हणजूणें, हडफडें, आसगांव आनी हेर वाठारांतल्या जमनींची बनावट कागदपत्रां, तशेंच 600 कोटीं परस अदीक मोलाच्या स्थावर मालमत्तांची अस्सल कागदपत्रां जप्त केल्लीं. मजगतीं, रोहन हरमलकार 3 जून 2025 ह्या दिसा चवकशे खातीर हाजीर रावलो. त्या वेळार ताणें चवकशेक आदार करूंक नाशिल्ल्यान ताका ईडीन अटक केल्ली. हे मजगतीं, रोहनान विशेश न्यायालयांत जामीन अर्ज दाखल केलो.
ह्या प्रकरणांत न्यायालयांत सुनावणी जाली तेन्ना, ईडीन पुरवणी म्हणणें सादर केलें. ते प्रमाण रोहन हरमलकार हाचे कडेन संबंदीत तपास सुरू केलो तेन्ना 100 कोटीं परस चड रकमेची मालमत्ता गुन्यांवांतल्यान मेळयल्ल्याचें मुखार आयलें. ह्या प्रकरणांत ईडीन सरकार मान्यताप्राप्त मुल्यांकन करप्यां कडल्यान खात्री करून घेतल्या. तपास जसजसो फुडें वतलो तसतसो गुन्यांवांतल्यान मेळयल्ले रकमेचें प्रमाण वाडपाची शक्यताय आसा. ही रकम शेंकड्यांनी कोटींनी पावतली. तशेंच आतां मेरेन ईडीन 35 जाणांचे जबाब नोंद केल्यात. तातूंत उपनिबंधक, मामलेदार, सरकारी अधिकारी तशेंच हेर खाजगी व्यक्तींचो आस्पाव आसा. हे व्यक्तींनी दिल्ले जबानी प्रमाण रोहन हरमलकार जमीन हडप प्रकरणाचो मास्टरमायंड आसा. तशेंच ताणें कशे तरेन हें काम केलां, हाची खोलायेन म्हायती साक्षिदारांनी दिल्या. साक्षिदारांनी दिल्ले म्हायती, डिजिटल रेकॉर्ड, अधिकृत सरकारी कागदपत्रां आनी ताणें फेरफार केल्ले न्यायालयीन रेकॉर्डाक लागून ताचो आस्पाव स्पश्ट जाता. ते भायर ताचे कडेन संबंदीत बँक खात्यांची तपासणी केली तेन्ना तातूंत एक कोटी रुपया जमा जाल्ल्याचें मुखार आयलां. ती रक्कम गोठयल्या, असो युक्तिवाद ईडीचे विशेश वकील सिद्धार्थ सामंत हांणी करून ताचो जामीन भायर मारपाची मागणी केल्या. ह्या प्रकरणाची फुडली सुनावणी 24 जुलयाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
