भांगरभूंय | प्रतिनिधी
गोंय क्रिकेट संघटणेचे मानद सचीव रोहन गांवस देसाय हांची भारतीय क्रिकेट नियामक मंडळाचे (बीसीसीआय) नवीन जोड सचीवपदाचेर एकामतान निवड केली. प्रशांत जोशी आनी दयानंद नार्वेंकार हांचे उपरांत बीसीसीआयच्या कार्यकारी मंडळांत पद मेळोवपी रोहन गांवस देसाय तिसरे गोंयकार थारले. प्रशांत जोशी आनी दयानंद नार्वेंकार हांणी बीसीसीआयंत उपाध्यक्षपद सांबाळिल्लें.
बीसीसीआयन शेनवारा मुंबयंतल्या आपल्या मुख्यालयांत नवीन जोड सचीव वेंचपा खातीर विशेश सर्वसादारण सभा (एसजीएम) आपयिल्ली. बीसीसीआयन हाचे आदीं 6 फेब्रुवारीक आपल्या संलग्नींत राज्य क्रिकेट संघटणांक हे विशीं नोटीस धाडिल्ली.
25 फेब्रुवारीक रोहन गांवस देसाय हांणी जोड सचीवपदा खातीर अर्ज दाखल केल्लो. ह्या पदा खातीर अर्ज भरपी एकोडो उमेदवार देसाय हांची अध्यक्ष रोजर बिन्नी आनी उपाध्यक्ष राजीव शुक्ला हांचे सयत हेर पदाधिकाऱ्यांचे उपस्थितींत तशेंच राज्य क्रिकेट संघटणांच्या प्रतिनिधींचे उपस्थितींत औपचारीकपणान जोड सचीव पदा खातीर निवड केली.
आंतरराष्ट्रीय क्रिकेट समितीच्या (आयसीसी) अध्यक्षपदाचेर जय शाह हांची निवड जाले उपरांत ह्या वर्साचे सुरवातीक आसाम क्रिकेट संघटणेचे देवजीत सैकिया हांकां प्रशासकी मंडळाचे नवीन सचीव म्हणून पदोन्नती दिल्या उपरांत बीसीसीआयचे जोड सचीवपद रितें जाल्लें. सैकिया हांच्या वांगडा छत्तीसगड क्रिकेट संघटणेचे प्रभतेजसिंग भाटिया हांची बीसीसीआयचे भांडारी म्हणून निवड केल्ली. ते पयलीं भांडारी आशिल्ले आशिष शेलार हांची महाराष्ट्राच्या मंत्रीमंडळांत मंत्री म्हणून नेमणूक जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
