रोमॅण्टीक अभिनेतो : जॉय मुखर्जी

भांगरभूंय | प्रतिनिधी

अभिनया वरवीं ताणें खांशेलो प्रेक्षकवर्ग तयार केल्लो. सृश्टींतल्या सौदेबाजी पसून तो सदांच पयस रावतालो, पूण…

हिंदी सिनेमासृश्टींतलो एक रुबाबदार अभिनेतो म्हणल्यार जॉय मुखर्जी. ताणें एक काळ गाजयलो. ‘एक मुसाफ़िर एक हसीना’, ‘फिर वही दिल लाया हूँ’, ‘लव इन टोक्यो’ आनी ‘शागिर्द’ सारक्या याद उरपी सिनेमांत ताणें काम केलें. जॉय मुखर्जीचेर चित्रीत केल्लीं आनी मुहंमद रफीन गायिल्लीं जायतीं गितां अजूनय लोकांच्या ओंठार आसात, जशें – ‘फिर वही दिल लाया हूँ’, ‘बहुत शुक्रिया बड़ी मेहरबानी’, ‘ले गई दिल गुड़िया जापान की’, ‘दुनिया पागल है या फिर मैं दीवाना’ और ‘बड़े मियाँ दिवाने ऐसे ना बनो’ आदि. जॉय मुखर्जील्या कुटुंबाचो चित्रपटां कडेन संबंद आशिल्लो. 

जॉय मुखर्जीचो जल्म 24 फेब्रुवारी 1939 दिसा झांसींत जाल्लो. बापायचें नांव शशिधर मुखर्जी आनी आवयचें नांव सती देवी, जी अशोक कुमाराची भयण. 

जाॅय मुखर्जीचो बापूय ‘फिल्मलया स्टुडिओ’ चो सहसंस्थापक. जॉयाचो भाव सोमू हो अभिनेत्री तनुजाचो घोव. काजोल ही तनुजाची धूव. जॉयाचे बायलेचें नांव नीलम. तांकां दोन पूत आनी एक चली. 

शशिधर मुखर्जीच्या पुराय कुटुंबाक चित्रपटांत आवड आशिल्ली, मात पूत जॉयाक चित्रपट अभिनेतो जावपाचें नाशिल्लें. भुरगेपणांत तो बापाय वांगडा सिने सेटार वतालो. बापूय करता तें शुटिंग बारीकसाणेन पळयतालो. तें ताका एक तमाशो कशें दिसतालें. ताका टेनिस खेळगडो जावन आंतरराश्ट्रीय नामना मेळोवपाची इत्सा आसली. जेन्ना जॉय बी.ए. शिकतालो तेन्ना एक दीस बापायन ताका विचारलें, जिवितांत कितें करपाचें आसा? ह्या प्रस्ना वांगडाच ताणें “हम हिंदुस्तानी” ह्या सिनेमाची ऑफर जॉय मुखार दवरली. पॉकेट मनी खातीर बरी रक्कम मेळटली ह्या हेतान जॉयान मन मारून कंत्राटाचेर सय केली. ताका आपलो अभिनय आनी पड्ड्या वयलो लूक आवडूंक नाशिल्ल्यान फिल्माचो ट्रायल शो चलतालो तेन्ना तो प्रीव्यू थिएटरांतल्यान घरा आयलो. जॉयाच्या नशीबांत टेनिस खेळगडो जावपाचें नाशिल्लें.

ताका आनीक दोन-तीन चित्रपटांची ऑफर मेळ्ळी. सुरवेक तो फाटीं-फुडें जातालो. ल्हव ल्हव ताची चित्रपटांची आवड वाडत गेली. ताचो परिणामूय ताच्या शिक्षणांचेर जावन बी.ए.च्या अभ्यासांत तो फाटीं पडलो आनी पास क्लासींत आयलो. त्या काळांत फिल्म निर्मातो बिमल राय ‘परख’ हो चित्रपट तयार करपाचे बेतांत आशिल्लो. ताणें जॉयचे कांय चित्रपट पळयिल्ले आनी ताका ‘परख’ खातीर नायकाची भुमिका दिवपाची पेशकश केली. जॉयान ताका न्हयकार दिलो. फुडें बिमल रॉयान तो चित्रपट बसंत चौधरी हांचे वांगडा पुराय केलो. जॉय मुखर्जीचो दुसरो चित्रपट ‘लव इन शिमला’. ताचें दिग्दर्शन नवोदित आर. के. नायर करतालो. सिंधींत काम केल्ली अभिनेत्री साधना हिका नायिका म्हणून घेतिल्ली. चडशें शुटींग शिमला जाल्लें. शुटींग वेळार प्रेक्षकांचें उलवणें जॉय मुखर्जीले कानार पडलें- “हो आनी खंयचो नायक जातलो? आरशांत आपलें तोंड तरी पळयलां?” हें सगळें आयकून जॉय ओगी रावलो, कारण ताचे कडेन जाप दिवपाक एकूय सुपरहिट फिल्म नाशिल्लें. ‘लव इन शिमला’ सुपरहिट थारलो. जॉय हाका स्टार दर्जो मेळ्ळो. साधनान नवी केंसांची पद्दत सोदून काडली, जी ‘साधना कट’ ह्या नांवान चलयां मदीं लोकप्रिय जाली.

1963 वर्सा प्रदर्शित जाल्लो “फिर वहीं दिल लाया हूँ’” हो चित्रपट जॉयाचे कारकिर्दींतलो एक उल्लेखनीय चित्रपट. तातूंत तांणें याद उरपा सारकी भुमिका केल्या. थोड्याच काळा भितर जॉय उंचायेर पावलो. ‘लव इन शिमला’ उपरांत जॉय मुखर्जीक सतत रोमण्टीक सिनेमां करचे पडले. देखीक : ‘लव इन टोकियो’,  ‘शागिर्द’, ‘एक मुसाफिर एक हसीना’आनी ‘एक बार मुस्करा दो’. 

जॉय मुखर्जीले ह्या चित्रपटांची कथा मोगाचेर आदारिल्ली. ताकाच लागून काश्मीराच्या सोबीत सुवातींनी सगले चित्रपट शुटींग जाले. जॉय मुखर्जीले समकालीन कलाकारां मदीं माला सिन्हा, शर्मिला टागोर, आशा पारेख आनी सायरा बानू हांचे कडेन बरे संबंद आशिल्ले. वैजयंतीमालाक तो चड मान दितालो. जॉय मुखर्जीक विदेशी अभिनेतो ग्रेगरी पॅकान चड आकर्शीत केलो. देव आनंदा सारको. जॉय पत्रकारा पसून अंतर दवरतालो. नट जावपाची इत्सा नासतना नट जावचो पडलो देखून फिल्मी ग्लॅमर जगांतल्या नखऱ्याची ताका जाणविकाय नाशिल्ली. जसो काळ बदललो धर्मेंद्र, जितेंद्र, राजेश खन्ना सारक्या हेर कलाकारांचो उदय जालो आनी जॉय फाटीं पडलो. लोकप्रियता उणी जाल्या हें मतींत दवरुंन जॉय फकत वेंचीक चित्रपट स्वीकारपाक लागलो. सैमिक सोबीत दृश्य दिवपाक जॉय मुखर्जीक खोशी जाताली, पूण नायिकेक परत परत पळोवन, तोंडार नकली हांसो हाडून, झाडां भोंवतणी नाचत गितां गावप ताका मातशें लेगीत आवड नाशिल्लें. तागेली जिणेचो मार्ग बदलपाची इत्सा आशिल्ली ‘हमसाया’ हो चित्रपट ताणें दिग्दर्शीत केलो, पूण फ्लॉप जालो तेन्ना जॉयान तो चुकीचे वेळार घेतिल्लो निर्णय अशें जाहीर केल्लें. ‘हमसाया’ उपरांत राजेश खन्ना आनी ज़ीनत अमान हांचे वांगडा ‘छैला बाबू’’ हो चित्रपट ताणें दिग्दर्शीत केलो, पूण हे खेपेय तो अपेशी थारलो. जॉय मुखर्जीचे मुखेल चित्रपट सांगचे जाल्यार-  1960- लव इन शिमला, हम हिन्दुस्तानी, उम्मीद, एक मुसाफिर एक हसीना, फिर वही दिल लाया हूँ, जिद्दी, जी चाहता है, इशारा, दूर की आवाज़, आओ प्यार करें, बहू बेटी, ये ज़िंदगी कितनी हसीन है, साज और आवाज़, लव इन टोकियो, शागिर्द, हमसाया (निर्माता- दिग्दर्शक), एक कली मुस्कायी, दिल और मुहब्बत, दुपट्टा.

पुरस्कार : मुजरिम, इंस्पेक्टर, एहसान, आग और दाग, कहीं आर कहीं पार, एक बार मुस्कुरा दो, हैवान, छलिया बाबू (दिग्दर्शक), इंसाफ मैं करूँगा.

जाॅय बरोच तेंप दुयेंत पडिल्लो. तागेलीं फुफ्फुसां काम करीनाशिल्ल्यान ताका स्वास घेवंक मेळनाशिल्लो. जॉय 9 मार्च 2012 दिसा संवसारांतल्यान अंतरलो. जॉय मुखर्जी हिंदी फिल्मांतल्या यशस्वी कलाकारांचे वळेरेंत सामील जावंक नासलो तरी तो कले खातीर समर्पित आशिल्लो. अभिनया वरवीं ताणें खांशेलो प्रेक्षक वर्ग तयार केल्लो. सृश्टींतल्या सौदेबाजी पसून तो सदांच पयस रावतालो, पूण ह्या रोमँटीक अभिनेत्याचेर चित्रीत केल्लीं म्होंवळ गितां ताच्या फॅन्सांच्या काळजांत अजूनय रिगल्यांत. 

—————————————

सुदिन वि. कुर्डीकार