भांगरभूंय | प्रतिनिधी
पणजीः राष्ट्रीय शिक्षण धोरणांत (एनईपी) रोमीचो उल्लेख फकत इंग्लीश बाराखडी A to Z हें लीपी खातीर आसा. कोंकणी फक्त देवनागरीनूच शिकयतले. रोमींत न्हय, अशें स्पश्टीकरण मुख्यमंत्री डॉ प्रमोद सावंत हांणी दिल्लें.
रोमी कोंकणी अभ्याक्रमांत आस्पावन घेवपाचो थाराव भायरायले उपरांत हळदणचे आमदार कार्लुस फरेरा हांणी सांगलें, सरकारान आपले लेखी जापेंत एनईपीत कोंकणी खातीर रोमी आनी देवनागरी दोनूय लीपींचो आस्पाव आसा अशी जाप दिल्या. जर फुडाराक रोमी लिपी वापरतले जाल्यार सरकारान हे विशींची फुडली कार्यवाही करची, फुडाराक ती वापरचे नात जाल्यार स्पश्टीकर दिवचें अशें आमदार फेरेरा हांणी सांगलें. सरकारान हे विशीं केल्लें विधान खरें काय चुकीचें तें स्पश्ट करचें, अशी मागणीय तांणी केली.
हे विशीं स्पश्टीकरण दितना मुख्यमंत्र्यान एनईपींत देवनागरी आनी रोमी ह्या दोंगाकय उर्बा दिवची, ही जाप सारकी आशिल्ल्याचें मान्य केलें. मात रोमी लिपी ही फकत इंग्लीश बाराखडी खातीर आसा. इंग्लीश बाराखडी A to Z ही रोमी लिपींत आसा. ती फकत इंग्लीशी खातीर आसा. कोंकणीचो उल्लेख फकत देवनागरी लिपींतूच आसा. देखून कोंकणी ही रोमींत शिकयतले हो गैरसमज काडून उडोवचो, असो सल्लो मुख्यमंत्र्यान दिलो.
सरकारी मुळाव्या शाळांचेर परिणाम जावपाक दिनासतना येवपी अनुदानीत नव्या कोंकणी शाळां खातीर सरकार सदांच उर्बा आनी अनुदान दिवपाक तयार आसा, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
