भांगरभूंय | प्रतिनिधी
मडगांव: रोबोटिक्स आनी एआय नवे पिळगेचो फुडार. देखून ज्या शाळांनी ह्या मळार बरो वावर जाता थंय तांकां ‘एआय लॅब’ वा हेर सुविधां खातीर गरजेचो निधी मेळपाची गरज आसा. येवपी राज्य अर्थसंकल्पांत हे खातीर विशेश तरतूद करपाची मागणी मुख्यमंत्र्या कडेन करतलो अशें भौशीक बांदकाम मंत्री दिगंबर कामत हांणी सांगलें.
कोंबांतल्या ‘समाजसेवा संघा’न एआय आनी रोबोटिक्स केंद्रांतल्या विद्यार्थ्यांच्या सृजनशील आविश्कारांचें प्रदर्शन ‘महिला नूतन हायस्कुलांत’ घडोवन हाडलें. ह्या प्रदर्शनाचें उक्तावण मंत्री दिगंबर कामत हांणी केलें. ह्या वेळार संस्थेचे सुदीन नायक, सुनील नायक तशेंच शाळेचे शिक्षक आनी प्राध्यापक हाजीर आशिल्ले. रिमोट कंट्रोल गाडी, ऑटोमेटिक डोअर लॉकिंग सिस्टीम आनी प्रस्नांक जाप दिवपी रोबॉट अशे सुमार 14 प्रकल्प ह्या प्रदर्शनांत सादर केलें.
ह्या वेळार मंत्री कामत हांणी सांगलें, सध्याच्या तंत्रगिन्यानाच्या काळांत शाळांनी रोबोटिक्स आनी एआयच्या म्हत्वांचेर भर दिलां. आतां भुरग्यांक प्राथमीक पांवड्या सावन हें प्रगत गिन्यान मेळटा. शाळेच्या पांवड्यारुच अशी म्हायती मेळ्ळ्यार भुरग्यांचो फुडार बरो थारतलो.
एआय आनी रोबोटिक्स शिक्षणाक लागपी किट्स खूब म्हारग आसता. हो खर्च सगळ्या पालकांक परवडना आनी संस्थांक देणगींचेर निंबून रावचें पडटा. देखून राज्य सरकारान अशा संस्थांक योग्य निधी दिवचो अशें सुदीन नायक हांणी सांगलें. हे मागणेक सकारात्मक जाप दितना मंत्री कामत हांणी निवेदना वरवीं मुख्यमंत्र्या कडेन चर्चा करपाचे आश्वासन दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
