भांगरभूंय | प्रतिनिधी
स्टार फुटबॉलर क्रिस्तियानो रोनाल्डोन आपलो उत्कृश्ट फॉर्म कायम राखतना आपल्या नांवाचेर आनीक एक विक्रम नोंदयलो. रोनाल्डोन सौदी प्रो लिगेच्या एका हंगामांत सगल्यांत चड गोल करपी खेळगडो थारलो. रोनाल्डोन अल नासर वतीन खेळटना अल इतिहाद आडचे मॅचींत ही कामगिरी केली. ताणें अल इतिहाद आडचे मॅचींत दोन गोल केले. 2023-24 हंगामांतलो 34 आनी 35वो गोल नोंदयत ताणें हो विक्रम केलो.
रोनाल्डोन दोन गोल करून अल नासरच्या जैतांत म्हत्वाची भुमिका वठयली. रोनाल्डोन मॅचींतलो पयलो गोल पयल्या अर्दाच्या अतिरिक्त वेळांत केलो. जाल्यार दुसरो गोल 69व्या मिनटाक हेडरा वरवीं केलो. हो गोल करिना फुडें सौदी प्रो लिगेच्या एका हंगामांत सगल्यांत चड गोल करपी खेळगडो थारलो. रोनाल्डोच्या दोन गोलां नेटार अल नासरान 4-2 फरकान जैत जोडलें. अल नासरान 34तल्यो 26 मॅची जिखल्यो आनी 82 गुणां सयत गुणतकट्यांतली दुसरी सुवात मेळयत हंगाम सोंपयलो. अल हिलाल 34तल्यान 31 जैता सयत 96 गुणां सयत पयली सुवात मेळयली.
सौदी प्रो लिगेतल्या एका हंगामांत सगल्यांत चड गोल केल्या उपरांत रोनाल्डोन सोशल मिडियाचेर एका पोस्टा वरवीं ताच्या येसा विशीं प्रतिक्रिया दिली. ताणें फोटो शॅर करून, कॅप्शनांत बरलां की आपूण विक्रमा फाटल्या धांवना, विक्रम आपल्या फाटल्यान धांवतात.
सौदी प्रो लिगेंत सगल्यांत चड गोल करपाचो विक्रम मोरोक्कोच्या अब्देरझाक हमदल्लाहच्या नांवार आशिल्लो. ताणें 2018-19च्या हंगामांत अब्देरझाकान 34 गोल केल्ले. रोनाल्डो डिसेंबर 2022त सौदी प्रो लिगेंत सामील जाल्लो.
पुर्तुगालाचो रोनाल्डो अजून मेरेन वेगळ्यावेगळ्या चार लिगांनी खेळ्ळा. हातूंत युरोपांतली प्रिमीयर लीग, स्पेनांतली स्पॅनीस लीग, इटलीची सिरी-ए आनी सावदी अरेबियाची सौदी प्रो लीग. ह्या सगल्या लिगांच्या एका हंगामांत सगल्यांच चड गोल करपाचो विक्रम लेगीत रोनाल्डोच्या नांवाचेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
