भांगरभूंय | प्रतिनिधी
दुबावितांचो सोद सुरू
मडगांव: पोरण्या हॉस्पिसिओ हॉस्पिटला कुशीक दुचाकी आडवी घालून राशीद अली हाका मारपेट केली. ताका वाटावपा खातीर गेल्ल्या शाकीद अली ह्या ताच्या भावाकूय मारपेट केली. ह्या प्रकरणांत फातोड्डें पुलिसांनी घडणूक थळार धांव घेवन मारपेट केल्ल्या दुबावितांचो सोद सुरू केला.
मडगांवां पोरण्या हॉस्पिसिओ हॉस्पिटला कुशीक बुधवारा दनपारां ही घडणूक घडली. दोगूय दुबावीत दुचाकी वेल्यान आयले आनी तांणी राशीद अली हाचे दुचाकी मुखार गाडी आडवी घालून ताका आडायलो. उपरांत गाडी लायिल्ल्याचें कारण दिवन ताका मारपेट करपाक सुरवात केली.
राशीद अली स्वताक वाटावपा खातीर लागसारच्या भलायकी केंद्राचे इमारतींत लिपलो आनी ताणें पुलिसांक कॉल केलो. उपरांत लेगीत दुबावितांनी आनीक कांय जाणांक आपोवन घेतले आनी भलायकी केंद्रांतलो उजो पालोवपी सिलिंडर काडलो आनी राशीद हाचे तकलेर मारलो.
राशीद अलीन दिल्ले म्हायती प्रमाण चार ते पांच जाणांनी मारपेट केल्ल्याचें सांगलें. गाडी मुखार व्हरपाक दिली ना आनी गाडी लायिल्ल्याचें कारण दिवन तांणी मारपेट केल्ल्याचें सांगलें. ह्या वेळार राशीद अलीक आडावपा खातीर आयिल्ल्या ताच्या भावाकूय मारपेट केली.
पुलिसांनी दोनूय जखमींक उपचारा खातीर दक्षीण गोंय जिल्हो हॉस्पिटलांत दाखल केल्यात. पुलीस निरिक्षक नाथन आल्मेदा हांणी सांगलें की चार ते पांच जाणांनी मारपेट केल्ल्याची म्हायती मेळ्ळ्या. जखमींक वैजकी उपचारा खातीर दक्षीण गोंय जिल्हो हॉस्पिटलांत दाखल केल्यात. ह्या प्रकरणांतल्या दुबावितांचो सोद घेतात अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
