भांगरभूंय | प्रतिनिधी
मडगांव: मडगांवच्या पोरण्या हॉस्पिसियो इमारती कुशीक दुचाकी आड घालून मोहम्मद राशीद अली (रा. बाणावली) आनी ताच्या भावाक मारपेट जाल्ली. ह्या प्रकरणांतलो दुबावीत अब्दुल मशाक तहसीलदार हाचो अटकपूर्व जामीन दक्षीण गोंय जिल्हो सत्र न्यायालयान भायरायलो.
मडगांवां पोरण्या हॉस्पिसियो इमारती कुशीक 20 ऑगस्ट दिसा दुचाकी चलयतना लागिल्ल्याच्या कारणा खाला मारपेट जाली. हातूंत मोहम्मद राशील अली आनी मोहम्मद शाकीद अली हांकां मारपेट केल्ली. फातोड्डें पुलिसांनी ह्या प्रकरणांत मोहम्मद राशीद अली हाचे कागाळी प्रमाण 16 अनवळख्यां आड गुन्यांव नोंद केल्लो.
उपरांत सीसीटीव्ही फुटेज आनी हेर पुराव्यांच्या आदारान फातोड्डें पुलिसांनी दुबावीत अब्दुल नबावाले (रा. पाजीफोंड), इम्रान बेल्लारी (रा. मोतीदोंगर), इमाम काझी (रा. पाजीफोंड) आनी रेहान शेख उर्फ यल्लाप्पा (रा. पाजीफोंड) आनी हजरत अली हांकां अटक केल्ली.
ह्या प्रकरणांत दुबावीत अब्दुल तहसीलदार हाचीय चवकशी करपाची आशिल्ल्यान ताचो ह्या प्रकरणांत थेट वांटो आशिल्ल्यान न्यायालयान ताचो अटकपूर्व जामीन अर्ज भायरायलो. उपरांत ताका न्यायालयांत हजर करतकूच चार दिसांची पुलीस कोठी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
