भांगरभूंय | प्रतिनिधी
कुजिराच्या रोझरी हायस्कुलान खेळां आनी युवा वेव्हार संचालनालयाच्या राज्य पांवड्या वयले 17 वर्सां पिराये सकयले शालेय टेबल टॅनीस सर्तींत लेगीत जबरदस्त प्रदर्शन केलें.
रोझरी हायस्कुलान चल्यांच्या आनी चलयांच्या गटांत वस्तादपण जोडून परतून दोट्टी किताब जिखलो. सर्त कांपाला वयल्या इन्डोर स्टेडियमाचेर जाली.
रोझरी हायस्कुलान 14 वर्सां पिराये सकयल्या गटांत लेगीत दोट्टी किताब जिखिल्लो. 17 वर्सां पिराये सकयल्या चल्यांच्या गटांतले फायनलींत रोझरी हायस्कुलान फोंडेंच्या उत्कर्ष विद्या मंदीराक 3-0 असो हारयलें. अॅरन फारियास, अक्षण लवंदे, आदित्य बोरा, स्वप्नील ध्यानी, ग्रेसन लोईतोंगबाम हांणी रोझरी हायस्कुलाच्या पंगडाचें प्रतिनिधित्व केलें.
चलयांच्या गटांतले फायनलींत रोझरी हायस्कलान फोंडेंच्याच ए जे दी आल्मेदा हायस्कुला आड 3-0 फरकान जैत जोडलें. चलयांच्या गटांत गार्गी सैकिया, धनिस्ता सैकिया, अॅड्रिया बोरा, वेदांशी अस्वाल ह्या खेळगडयेंचो रोझरी पंगडांत आस्पाव आशिल्लो.
दोनूय पंगडांक शारिरीक शिक्षण शिक्षक निकेश मंगेशकाराचें मार्गदर्शन लाबलें. इनामां भेटवण सुवाळ्याक राज्य खेळां आयोजक अनंत सावळ, रायन परेरा, एलरॉय पिंटो, क्लिफ्टन फर्नांडीस, विष्णू कोलवाळकार आनी जयवंत हमनावर उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
