रोझरी हायस्कुलाक दोट्टी मुकूट

भांगरभूंय | प्रतिनिधी

कुजिराच्या रोझरी हायस्कुलान खेळां आनी युवा संचालनालया वतीन घेतिल्ले राज्य पांवड्या वयले 14 वर्सां पिराये सकयले टेबल टॅनीस सर्तींत दोट्टी किताब जिखलो. सर्त कांपाला वयल्या इन्डोर स्टेडियमार जाली.

चल्यांच्या गटांतले फायनलींत रोझरी हायस्कुलान सां जुझे दी आरियलाच्या किंग्स हायस्कुलाक 3-1 अशा फरकान हारयलें. म्हापशेंच्या सारस्वत विद्यालयान फोंडेंच्या जीव्हीएम उत्कर्ष विद्या मंदीराक 3-1 हारोवन तिसरी सुवात मेळयली.

चलयांच्या गटांतले फायनलींत रोझरी हायस्कुलान मडगांवच्या मनोविकास इंग्लीश हायस्कुला आड 3-1 फरकान जैत जोडलें. म्हापशेंच्या जी एस आमोणकार विद्या मंदीराक तिसरी सुवात फावो जाली. ताणें मंगेशीच्या व्हीडी अॅण्ड एसव्ही वागळे हायस्कुलाक 3-1 हारयलें.

रोझरीच्या चल्यांच्या पंगडांत दिव्यांश कश्यप, लामजिंग्बा लैतान्थेम, चिन्मय मणेरकार, एथन कामोतीम आनी भावेश शिरोडकार हांचो आस्पाव आशिल्लो, जाल्यार रोझरीच्या चलयांच्या पंगडाचें प्रतिग्या, ब्रेटनिया लैश्राम, वंशिका मिश्रा, योगिता, अंबिशा नायक हांणी प्रतिनिधित्व केलें. दोनूय पंगडांक शारिरीक शिक्षण शिक्षक निकेश मंगेशकाराचें मार्गदर्शन लाबिल्लें.

इनाम भेटवण सुवाळ्याक खेळां खात्याच्या मुख्यालयातल्या विभागीय खेळां आयोजक उमेश फडते, सर्तीचे मुख्य तंत्रीक अधिकारी विष्णू कोलवाळकार, तंत्रीक अधिकारी जयवंत हमनावर, खात्याचे राज्य खेळां आयोजक अनंत सावळ उपस्थीत आशिल्ले.