भांगरभूंय | प्रतिनिधी
आदलो पयल्या क्रमांकाचो टॅनीस खेळगडो रोजर फॅडररान अखेरेक आपले 24 वर्सांचे टॅनीस कारकिर्दीक पुर्णविराम लायलो. फुडल्या सप्तकांत जावपी लेव्हर कप ताची निमाणी एटीपी सर्त आसतली.
फॅडरराक ग्रास कोर्टा वयल्या म्हान खेळगड्यांतलो एक मानतात. ताणें दादल्यांच्या एकोड्या गटांत सगल्यांत चड आठ विम्बल्डन किताब जिखल्यात. तशेंच ताणें स ऑस्ट्रेलियन ओपन आनी पांच अमेरिकन ओपन किताब लेगीत जिखल्यात. पूण, क्ले कोर्टाचेर जावपी फ्रॅंच ओपन ताका फक्त एकदाच जिखपाक शक्य जाल्या.
दादल्यांच्या एकोड्या गटांत सगल्यांत चड ग्रॅण्ड स्लॅम जिखपाचे वळेरेंत तो तिसरे सुवातेर आसा. पूण, सगल्यांत पयलीं 20 ग्रॅण्ड स्लॅम किताब जिखपी तो संवसारांतलो पयलो दादलो टॅनीस खेळगडो आसा. सगल्यांत चड ग्रॅण्ड स्लॅम किताब जिखपाचो विक्रम स्पेनाच्या राफायल नादालाच्या नांवाचेर आसा. ताणें 22 किताब जिखल्यात, जाल्यार दुसरे सुवातेर आशिल्ल्या सर्बियेच्या नोवाक जोकोविचान 21 किताब जिखल्यात.
फॅडरर पोरूं जुनांत खेळयिल्ले फ्रॅंच ओपनाचे चवथे फेरयेंत पावल्या उपरांत सर्तींतल्यान फाटीं सरपाचो निर्णय घेतिल्लो. ताणें विम्बल्डना खातीर स्वताक तंदुरुस्त दवरपाक हो निर्णय घेतिल्लो. पूण, ताका क्वॉर्टरफायनलींत हार घेवची पडिल्ली. तेन्ना पसून तो टॅनीस कोर्टा पसून पयस आशिल्लो.
ताणें आपलो निमाणो ग्रॅण्ड स्लॅम किताब 2018त ऑस्ट्रेलियन ओपनांत जिखिल्लो.
ऑस्ट्रेलियन ओपनः (2004, 2006, 2007, 2010, 2017, 2018)
फ्रॅंच ओपनः (2009)
विम्बल्डनः (2003, 2004, 2005, 2006, 2007, 2009, 2012, 2017)
अमेरिकन ओपनः (2004, 2005, 2006, 2007, 2008)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
