रोजगार चड म्हत्वाचो

भांगरभूंय | प्रतिनिधी

आपमजत गटांनी आपल्या उत्पादनांचो दर्जो उंचेलो आसतलो हें कायम मतींत दवरचें पडटलें. गोंयचो खाशेलो अशे कांय जिन्नसूय मुखार हाडपाक जाय.

गोंय सुदारिल्लें, सुखवस्तू आसलें तरीय हांगा कांय उणाव आसात, तें बुधवारा सादर जाल्ल्या अर्थसंकल्पा वरवीं दिसून आयलां. भलायकी सेवेच्या मळार आतां तज्ञ सर्जन, बायलांचे दोतोर हांची कंत्राटाचेर सेवा घेवपाचो निर्णय सरकारान घेतला. भलायकी सेवा संचालनालयाच्या केंद्रांनी ही सेवा मेळटली. खास करून गांवगिऱ्या वाठारांनी. गोंयांत तशे खूब दोतोर आसात. मात, चडशे शारांनी एकवटल्यात. आतां प्रत्येक वाड्यार, काॅलनींत 7- 8 तरी गाडयो आसतात, ताका लागून दुयेंतीक हाॅस्पिटलांनी व्हरपाक मेळटा. आदल्या तेंपार तांकां व्हरतना वाटेरूच जीव वचत ही भिरांत आसताली. आयज गांव सुदारले तरी रातच्या वेळार दोतोर मेळत हाची मात्तूय खात्री ना. कारण फोन करतकच घरा येवन सेवा दिवपी दोतोर गोंयांत हाताच्या बोटांचेर मेजपा इतले आसतले. गांव, शारांतलींय भलायकी केंद्रां, हाॅस्पिटलां रातचीं आठ- साडेआठ मेरेन दिवे पालोवन न्हिदतात. एकादरो आडवाद आसत. चडशीं दुयेंतीक ‘चलो पणजी’ म्हणटात. दोतोरां खातीर बऱ्याच वर्सां पयलीं खास घरां (क्वाॅटर्स) बांदल्यांत, मात तांकां भूतबंगल्याचें स्वरुप आयलां. आणीबाणीचो प्रसंग आयलो जाल्यार गांवांनी दोतोर जाय. सरकारान थळाव्या दोतोरांची कंत्राटाचेर सेवा घेवपाोच निर्णय गंभीरपणान चालीक लावचो. कारण, पयलीं परस आतां दुयेंतींचो आंकडो वाडला. दुयेंतींक भलायकी केंद्राचेर हाडपाक रस्ते निटायेर घालचे पडटले, अॅम्ब्युलन्सूय सज्ज दवरची पडटली.
हेर राज्यांनी आसा, तितली गरिबी गोंयांत नासली तरी, बेरोजगारी आनी म्हारगायेक लागून गांवगिऱ्या वाठारांनी गरिबांचो आंकडो वाडटना दिसता. अर्थांत गरजो उण्यो दवरीत जाल्यार जिणेंचें व्हडें ल्हवू ल्हवू तडीक लावं येता. कश्ट करपाची तयारी आशिल्ल्यांक सरकारान हात दिवपाचें उतर अर्थसंकल्पांत दिलां. खेडेगांवांतली गरिबी पयस करपाक थंयच्या गांवकारांक शाश्वत उदरनिर्वाहाची गरज आसा. आज तांकां पोटा फाटल्यान गांव सोडचो पडटा. जिवितांत वयर सरतलो जाल्यार गांव सोडपाक जाय, अशें म्हणटात. पूण आनीक कितलीं वर्सां? बिहारा सारकें राज्य आयज रिकामी जावपाक पावलां. प्रत्येक राज्यांतले सत्ताधारी फुडारी (केंद्र सरकाराच्या पालवान) थंय प्रामाणिकपणान शाश्वत उदरगत करीत जाल्यार राज्याराज्यांनी जावपी स्थलांतरां उणीं जातलीं. कांय राज्यांनी चालू आशिल्लो भायले- भितरले संघर्शूय सोंपतलो. गोंयांत 162 आपमजत गट आनी 7 नव्यो ग्राम संघटनां सरकारान स्थापन केल्यात. तांचे वरवीं रोजगाराची संद निर्माण जावची. सगले गांव एकजुटीन माथे मारीत जाल्यार बेरोजगारीचें वजें उखलून भायर मारप तशें कठीण न्हय. आपमजत गटांनी आपल्या उत्पादनांचो दर्जो उंचेलो आसतलो हें कायम मतींत दवरचें पडटलें. गोंयचे खाशेले अशे कांय जिन्नसूय मुखार हाडपाक जाय. ‘गोवा की स्पेशालिटी क्या है?’ म्हणटकच सामोसो, शेव- चिवडो हातार पडटा. खाणां, सरबरायेच्या मळा वयल्या मानेस्तांनी हाचेर विचार केल्यार बरो. आप मजत गटांच्या होम स्टे पर्यटन प्रकल्पांत 100 परस चड घरांचो आस्पाव करपाचो विचार आसा. हे होम स्टे प्रकल्प दर्यादेग वाठारांतल्या घराघरांनी आसतले. मात तांचो अधिकृत हाॅटेलांचेर परिणाम जावचो ना, हेंय पळोवचें पडटलें.
कोंकणी राजभास जावन 36 वर्सां जायत आयलीं. ह्या कायद्याक गती दिवपाचो यत्न जावंक फावो. आतां राजभास संचालनालया खातीरची तरतूद 69.56 टक्के वाडोवन 21 कोटी 45 लाख रुपया केल्या. आतां कोंकणी सरकार दरबारांत घटाय मेळटली, अशी आस्त बाळगुपाक हरकत ना. राजभास कायदो चालीक लावपाचो यत्न आतां सगल्यांनी करपाक जाय. हालींच्या वर्सांनी अर्थसंकल्प कोंकणींतूय जाता. मुख्यमंत्री सावंत हांकां इत्साशक्त, मायभाशेचो मोग आसा. तांणी राजभाशेचें धनुश्य आतां उखलचेंच! खेळा मळाचेर आमचें गोंय बरेंच फाटीं आसा. पूण बुद्धीबळ, सेलिंग, बाॅक्सिंगांत आमी नांव जोडलां. हालींचीं कांय वर्सां सोडलीं जाल्यार फुटबाॅलांतूय गोंय राष्ट्रीय पांवड्याचेर गाजलां. दिलीप सरदेसाय, पारस म्हांबरे सोडल्यार आंतरराष्ट्रीय क्रिकेटींत अजून कोण गोंयकार पावंक ना. राष्ट्रीय, आंतरराष्ट्रीय पांवड्याचेर भांगरा पदक मेळोवपी खेळगड्याक कायम सरकारी नोकरी दिवपाची घोशणा अर्थसंकल्पांत जाल्या. निदान आतां तरी गोंयकार खेळगडे मुखार येवं. पूण ताचे पयलीं तांकां बरें मैदान, उत्कृश्ट प्रशिक्षण नेमान मेळटलें, हाची खबरदारी घेवची पडटली. सगल्या खात्यांचें सहकार्य मेळ्ळ्यार अर्थसंकल्प प्रत्यक्षांत येवप कठीण न्हय.