भांगरभूंय | प्रतिनिधी
गोंयांत फाटल्या तीन वर्सांच्या काळांत 116 स्टार्टअप सुरू जाल्यात. तातूंतल्यान 1749 तरणाट्यांक रोजगार मेळ्ळा. केंद्रीय मंत्री रामेश्वर तेली हांणी लोकसभेंत दिली. देश पांवड्याचेर 6 लाख 29 हजार तरणाटे ह्या नव्या उद्देगांक लागून पोटाक लागल्यात. खोशेची गजाल. मुख्यमंत्री डाॅ. प्रमोद सावंत हांणीय सुरवेक सावन आपरोजगार, स्टार्टअपांक फाटबळ दिलां. तरणाटे स्वता स्वावलंबी जातले आनी आपल्या वांगडाच दुसऱ्यांकूय नोकऱ्यो दितले हाचेर भर दिवन तांणी सरकारी यंत्रणा कामाक लायल्यात. पंचायतींनी नेमिल्ले स्वयंपूर्ण मित्र हे बाबतींत बरें काम करपाक शकतात. कारण सुशिक्षीत तरणाट्यांक, शेतकारांक, उद्देजकांक जायते फावटी सरकारी येवजण्यांची खबर पसून नासता. खरें म्हणल्यार दरेका पंच, नगरसेवकान दर दोन म्हयन्याांनी साबार येवजण्यांची, सवलती, अनुदानांची म्हायती सगल्या लोकांक दिवपाक जाय. फक्त आपल्या वावुरप्यांक न्हय! ‘सरकार तुमच्या दारांत’ ही कार्यावळ तर दर म्हयन्याक गांवांगांवांनी जावंक जाय, म्हणटकच रोजगाराच्या मळाचेर तरणाटे उबे रावतले आनी दुसऱ्यांकूय उबे करतले. गोंयचे बरेच पारंपरीक उद्देग बंद जाल्यात. आसात ते संबंदीतांक परवडनात. गोंयचें हें दायज. तें सांबाळप आमचें कर्तव्य. तांकां फाटीं अर्थीक मजत दिवपाची घोशणा जाल्ली. मजत दितालेय बी. खाजेकार, चणेकार, पोदेर, पाडेली, रेंदेर, सोऱ्याची भट्टी लावपी, दिवल्यो, पाटले, हांतरी, मडकीं करपी….. कितलेशेच वेवसाय आसात. गोंयची फुडली पिळगी लज नासतना तातूंत देंवतली, हे खातीर उपाय येवजण आंखची पडटली.
राज्य सरकार स्टार्टअपा खाला वेवसाय करपाक 10 लाख रुपयांचें रीण दिता. म्हायती तंत्रज्ञान खात्या कडेन 184 अर्ज आयिल्ले, तातूंतल्या 116 उद्देगांक मान्यताय मेळ्ळ्या. मात, ह्या लघुउद्देग, स्टार्ट अप, आपरोजगाराचो सरकारी यंत्रणांनी नेमान नियाळ घेवपाक जाय. तशें केल्यार तांकां कितें अडचणी येतात, कोण सतायता… हें कळपाक बरें जातलें. तशेंच फक्त अनुदानाचे दोळो दवरून कांय लोकांनी पावलां मुखार घाल्यात जाल्यार तेवूंय कळटलें. कारण हाचे पयलीं अशे प्रकार घडल्यात. नेटान सुरू जाल्ले कारखाने उपरांत रातयां बंद जाल्यात. उद्देगीक वसणुकांनी पासय मारल्यार बऱ्योच गजाली कानार पडटल्यो. गोरवां मेलीं, उजो लागलो, हें जालें आनी तें जालें अशीं कारणां ल्हवूच मुखार करून ‘स्टार्टअप’ कांय म्हयन्यांनी ‘क्लोजअप’ जाल्यात!! गोंयकारांची मानसिकताय, आवड मतींत घेवन त्या तरांचे कारखाने हाडप वा तसलेच स्टार्ट अप सुरू करप गरजेचें. अर्थांत ते खातीर तसले अभ्यासक्रमूय शिकूंक फाव. नाजाल्यार भायलें भिरें येत रावतलें. गोंयकार तरणाट्यांनीय आतां नोकरे संबंदीची आदली ‘हांव गोंयचो सायबा’ वृत्ती सोडूंक फाव. कारण हाचे मुखार, आमकां जाय तसल्यो नोकऱ्यो मेळटल्योच हाची खात्री ना.
स्टार्टअपाचे उर्बा दिवपी बातमे वांगडाच मानाय, बेरोजगार तरणाट्यांचे आत्महत्येचो दुखदिणो आंकडोय मुखार आयला. केंद्रीय कामगार मंत्री भूपेंद्र यादव हांणी ही म्हायती लोकसभेंत सादर केल्या. दिसवड्याचेर काम करपी 1 लाख 12 हजार मानायांनी फाटल्या तीन वर्सांत आत्महत्या केल्यात. 2019 ते 2021 हो तो काळ. तेन्ना कोरोना धुमाकूळ घालतालो. व्हडले उद्देग बंद जाल्ले. ल्हान उद्देगांकूय घरघर लागिल्ली. ताका लागून दिसवड्याचेर काम करपी लोक अक्षरशा भिकेक लागिल्ले. फाटल्या वर्सभरांत परिस्थिती सुदारल्या. पूण, उद्देगीक मळाक अजून नेट येवपाचो आसा. म्हारगाय वाडल्या, ताचोय परिणाम जाता. गरिबांचो आंकडो वाडटा, तो ताकाच लागून. शेतांनी काम करपी मानाय, कामेरीं मेळून 31,839 परस चड लोकांनी जीव दिला. खुद्द शेतकार गेल्यात, तांचो आंकडो वेगळो आसतलो! शेतकी मळ हें आपरोजगाराचेंच. ताचे वांगडाच जोडधंदे करीत, आधुनिक तंत्रज्ञानाची मजत घेत जाल्यार भरपूर जोडूं येता. पोरूं दिल्ली शिमेचेर शेतकारांचें आंदोलन जाल्लें. तांच्यो मागण्यो कितें आशिल्ल्यो, ताचेर विचार जाला? महाराष्ट्रांत, आंध्रांत शेतकार आत्महत्या करतात, ताचे फाटलीं कारणां सोदपाक आनी ताचेर उपाय करपाक आनीक कितलीं वर्सां लागतलीं? ‘आझादी की शताब्दी’ मेरेन वाड्या वाड्यार स्टार्टअप जावचे आनी लोकसभेंत आत्महत्यांची वळेरी मांडपाचो वेळ येवचो न्हय. आमेन.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
