भांगरभूंय | प्रतिनिधी
दरवर्सा अर्थसंकल्प जातात, पूण सर्वसामान्य लोकांचें लक्ष आयकरांत कितली सवलत मेळ्ळी, कितें सवाय जालें आनी कितें म्हारग हाचेरुच लक्ष आसता. उद्देजक, वेवसायीक, धंदेकारांचो आपणाक कितें फायदो जाला, तें जाणून घेवपाचेर भर आसता. राज्यांक कितलो निधी मेळ्ळा तें राज्य सरकारांक पळोवपाचें आसता. सरकार समर्थक अर्थसंकल्पाची तोंड भरून तुस्त, तोखणाय करतात आनी विरोधक उणाव सोदून टिका करतात. केंद्रीय अर्थमंत्री निर्मला सीतारमण हांणी प्रधानमंत्री नरेंद्र मोदी हांच्या कार्यकाळांतलो सातवो अर्थसंकल्प सादर केलो. फाटोफाट सात फावटी अर्थसंकल्प सादर करपी ती पयली बायल अर्थमंत्री. सगल्यांत चड एका फाटल्यान एक अर्थसंकल्प पी. चिदंबरम (9), प्रणब मुखर्जी (8), सी. डी. देशमुख (7), मुरारजी देसाय (6, वट्ट 10) हांणी सादर केल्यात. अर्थसंकल्पांत प्रत्येक मळा खातीर दवरिल्लो निधी योग्य पद्दतीन वापरून नियोजन केल्लीं उदरगतीचीं कामा हाता वेगळीं करपाक जाय. फक्त घोशणा जाली आनी निधीचो वापर जावंक ना वा तो भलतेच कडेन गेलो जाल्यार तें देशाचें आनी देशवासीयांचें लुकसाण.
अंदूंच्या अर्थसंकल्पांत रोजगाराचेर, कुशळटाय विकासाचेर चड भर दिला. उत्पादन मळा वयलो रोजगार वाडोवपाचेंय थारायलां. अर्थसंकल्पांत तरणाट्यांचो विचार केल्ल्याचें दिसता. पयलेच खेप प्राॅव्हीडंट फंडांत नांव नोंद जावपी कर्मचाऱ्यांक तीन हप्त्यांनी 15 हजार रुपया सरकार दितलें. ह्या भत्याचो एक लाखा सकयल पगार घेवपी तरणाट्यांक फायदो जातलो. ज्यो कंपनी अतिरिक्त कर्मचारी घेतल्यो, तांकां कर्मचाऱ्या फाटल्यान दर म्हयन्याक तीन हजार रुपया सेगीत दोन वर्सां मेळटले. नोकरी दिवप्यां वयलें अर्थीक वजें उणें जावचें आनी तांणी चडांत चड कर्मचारी घेवचे, आपल्या वेवसायाचो विस्तार करचो, हे खातीर ही येवजण आंखल्या. ती येसस्वी जाली जाल्यार अतिरिक्त 50 लाख लोकांक रोजगार मेळटलो, असो अदमास सरकारान उक्तायला. मात हे बाबतींत पारदर्शकताय जाय. दोन वर्सांनी ते कर्मचारी नोकरेचेर उरपाक जाय. कारण फकत सरकारी सवलतीं खातीर उद्देग, वेवसाय करपी बरेच लोक आमच्या देशांत आसात आनी ते सरकाराक विवीध मार्गांनी सहज फटयतात. तांचेर सगल्या राज्यांच्या कामगार खात्यांनी नदर दवरची पडटली.
उत्पादन मळा वयल्या उद्देग, वेवसायांक उर्बा दिवपाचें सरकारान थारायलां. तातूंत चडांत चड बायल कर्मचारी, कामगार येवच्यो म्हूण अर्थसंकल्पांत तजवीज केल्य. तांकां रावपाक हाॅस्टेलां उबारप, कुशळटाय वाडोवप, उद्देगांनी तांची भागीदारी वाडटली, हे खातीर यत्न करप, आप मजत गट फायद्यांत हाडप हे खातीर खाशेल्यो तरतुदी केल्यात. सगल्यांत म्हत्वाचें म्हणल्यार रोजगार इत्सुकांची कुशळटाय वाडपाक जाय. कारण आयज विवीध कला, कारागिरीच्या बळग्याक नोकरदार मनशा परस चड जोडपाक मेळटा. नोकरी करपी मनीस पसून फाविल्ल्या वेळांत घरगुती वेवसाय करून जोडपाक शकता. कुशळटाय वाडोवपाक आयटीआयंनी नवे अभ्यासक्रम सुरू करपाचें सरकारान थारायलां. नोकरी मेळूंक ना जाल्यार ह्या तरणाट्यांक स्वताचो वेवसाय सुरू करपाक मेळटलो हातूंत दुबाव ना.
नवे आयकर कर-रचणुकेंत स्टँडर्ड डिडक्शनाची मर्यादा 50 हजारां वयल्यान 75 हजारां मेरेन वाडयल्या. पेन्शनाची मर्यादाय 15 हजारां वयल्यान 25 हजारां मेरेन व्हेल्या. हाचो सादारण चार कोटी पगारदार, पेन्शनधारकांक फायदो जातलो, अशें सरकारान म्हणलां. हे कर-रचणुकेंत वर्साक 3 ते 7 लाख रुपया जोडप्यांक पांच टक्के आयकर भरचो पडटलो. पोरणें करप्रमाणींत 7 लाख जोडपी पगारदाराक 10 टक्के कर दिवचो पडटलो. पोरणी कर-रचणूक रद्द करपाचो सरकाराचो विचार आसा, अशी हवा आसा. मात लोकांचें मत विचारांत घेवनूच ते विशीं फुडाराक (सध्या तरी ना.) निर्णय घेतले, अशें अर्थमंत्र्यान म्हणलां.
हेर खंयच्याय राज्यां परस बिहार (26,000 कोटी) आनी आंध्र प्रदेशाक (15,000 कोटी) पेजाद निधी मेळ्ळा. आंध्रप्रदेशाच्या नशिबांत धा वर्सां उपरांत हें भाग्य आयलां. ह्या तरतुदींक लागून बिहाराचे मुख्यमंत्री नितीशकुमार आनी आंध्राचे मुख्यमंत्री चंद्रबाबू नायडू खोशी जाल्याच आसतले. विद्यार्थ्यांक शिक्षणा खातीर आतां भरपूर सवलती आसात. देशांतर्गत शिकप्यांक उच्च शिक्षणा खातीर 10 लाखां मेरेन अर्थीक साह्य मेळटलें. माॅडेल स्कील लोन येवजणे खाला साडेसात लाखां मेरेन रीण दितले. सोलर पॅनल सवाय जातले. इलेक्ट्रीक गाडयांच्या बॅटरीं वयलो कर उणो केला. कॅन्सरा वयलीं वखदां सवाय जातलीं. हाची चड गरज आसा. कारण 25 वर्सां पयलीं आशिल्ली समाजीक भलायकी आयज ना. आतां काॅलेजकुमारांक पसून दुयेंसां जाल्लीं दिश्टी पडटात. फुडलो काळ चड भिरांकूळ जावचे पयलीं आमी उपाय घेवपाक जाय. मोबायल फोन सवाय करपाची गरज नाशिल्ली. जिणे गरजेच्या वस्तूंचेर कर भरचो पडटा, जीएसटी कापून घेतात, तो उणो जाल्लो जाल्यार सामान्य भौसाक थोडी थाकाय मेळपाची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
