रोखडेंच करतले कृशी धोरण निश्चीत

भांगरभूंय | प्रतिनिधी

मुख्यमंत्रीः डॉ. प्रमोद सावंतः सांखळे कृशी महोत्सवाचें उक्तावण

भांगरभूंय । प्रतिनिधी

दिवचलः कृशी संस्कृतीचें गिरेस्त दायज सांबाळचे खातीर आधुनीक तंत्रज्ञानाचो वापर करून समग्र शेतां कसपाक मेळचीं, हे खातीर रोखडेंच कृशी धोरण निश्चीत करतले, अशें मुख्यमंत्री डॉ. प्रमोद सावंत हांणी सांगलें.

कृशी खात्या वतीन सांखळे आयोजीत केल्ल्या दोन दिसांच्या भव्य कृशी महोत्सवाच्या उक्तावण सुवाळ्यांत मुख्यमंत्री उलयताले. ह्या वेळार तांचे वांगडा कृशी मंत्री रवी नायक, संचालक नेवील आफोंन्सो, नगराध्यक्ष रश्मी देसाय, जिल्हो पंचायत वांगडी महेश सावंत, गोपाळ सुर्लकार, विश्वभंर गांवस, विवीध पंचायतींचें सरपंच कृष्णा गांवस, राजन फाळकार तशेंच कृशी अधिकारी निलिमा गांवस हांजीर आशिल्ली.

कृशी धोरण चालीक लागले उपरांत खूबश्यो नव्यो संकल्पना चालीक लागतल्यो. हे मुखार शेतजमीन शेतकार सोडून हेर कोणाकूच ती विकपाक मेळची ना. हे बाबतींत सरकारान खर भुमिका घेतल्या. तरणाट्यांनी हरीत आनी धवल क्रांतीच्यो ध्यास घेवन स्वयंपूर्ण गोंय संकल्पना पुराय करचे खातीर गोंयभर शेती वेवसायाक चालना दिवची. सरकार सगळे तरेन आदार करतलें, अशी हमी मुख्यमंत्री डॉ. सावंत हांणी दिली.

कश्ट करपी शेतकार लखपती जावचो, हे खातीर प्रधानमंत्री नरेंद्र मोदी हांणी खूबश्यो म्हत्वकांक्षी येवजण्यो चालीक लायल्यात. कळंतर नाशिल्लीं रिणां आनी साबार सवलती उपलब्ध करून दिल्यात. शेतकारांच्या कश्टांची दखल घेवन पद्मश्री पुरस्कार दिवन बळीराजाचो भोवमान प्रधानमंत्री मोदी हांणी केला. ते खातीर शेतकारांची उर्जा बाडल्या. विवीध येवजण्यो आंखून नुस्तें पोसप, कोंबयो पोसप, दूद उत्पादन, भाजी उत्पादन, समग्र शेतीच्या माध्यमांतल्यान शेतकार बरे तरेन उत्पन्न घेवन गोंयाक स्वयंपूर्ण करपाक शकता. तेचवरी स्वता आत्मनिर्भर जावपाक शकता, असो विस्वास आयज निर्माण जाला, अशें मुख्यमंत्र्यान सांगलें.

मंत्री रवी नायक हांणी सांगलें, आपल्या पुर्वजांची जमीन विकूं नाकात. फुडले पिळगे खातीर  हें दायज सांबाळून दवरात. तरणाट्यांनी आधुनीक तंत्रज्ञानाचो वापर करून शेतीच्या माध्यमांतल्यान उदरगत करचे खातीर फुडाकार घेवचो आनी आपली अर्थीक परिस्थिती सुदरावची.

जमीन पडीक दवरिल्ल्यान ताचेर खूब जाणांच्यो नदरो आसता. आयज दिल्लीकार जमनी ताब्यांत घेतात. ताका लागून नव्या कृशी धोरणाच्या माध्यमांतल्यान रोखडीच गोंयांत शेतीच्या मळार व्हड क्रांती जातली, अशें मंत्री नायक हांणी सांगलें. तशेंच मुख्यमंत्र्यांचें हात घट करचे खातीर लोकसभेच्या दोनूय सुवातांचेर भाजपाक जैतवंत करपाचो तांणी उलो मारलो.

ह्या वेळार विवीध सर्तींतल्या जैतवंतांक इनामां भेटयलीं. यादस्तिका प्रकाशन तशेंच पद्मश्री पुरकार जैतवंत प्रगतीशील शेतकार संजय पाटील हांचो सत्कार केलो.

ह्या महोत्सवांत कृशी मळा कडेन संबंदीत तज्ञांनी शेतकारांक विवीध विशयांचेर मार्गदर्शन केलें. महोत्सवांत खूबशे स्टॉल्स उबारिल्ले, तांचें उक्तावण मुख्यमंत्री डॉ. सावंत हांचे हस्तुकीं जालें. शेतकारांच्या ह्या महोत्सवाक व्हड प्रतिसाद मेळ्ळो.

‘खूबश्यो येवजण्यो शेतकारां कडेन पावोवपाचो यत्न’

शेतकार हो अन्नदाता. ते खातीर साबार येवजण्यो तांचे मेरेन पावोवपाचो सरकारान ध्यार धरला. कुसूम येवजणेंतल्यान सुमार 200 जाणांक फुकट सोलर पंप रोखडेच वितरीत करतले, अशी घोशणा मुख्यमंत्री डॉ. प्रमोद सावंत हांणी केली. कश्ट करून पिकयिल्ल्या उत्पादनाक बाजारपेठ मेळोवन दिवचे खातीर सरकारान खूबश्यो येवजण्यो आंखल्यात. आधारभूत किंमत तशेंच सगळे तरेचो आदार शेतीक मेळटा. ते खातीर कोणेच शेती पडीक दवरचीं न्हय. चड करून तरणाट्यांनी शेती वेवसायांक रस घेवचो, अशेंय मुख्यमंत्र्यांनी मागलें.