भांगरभूंय | प्रतिनिधी
भारताच्या पंगडांतलो आक्रमक बॅट्समन रॉबिन उथप्पान क्रिकेटींतल्या सगल्या प्रकारांतल्यान निवृत्त जावपाची घोशणा केली. ताणें ट्वीट करीत एक निवेदन जारी केलें.
आपल्याक भारता वतीन आनी कर्नाटक वतीन खेळिल्ल्याचो अभिमान आसा अशें ताणें ह्या निवेदनांत म्हणलां. उथप्पान 2006त आंतरराष्ट्रीय क्रिकेटींत पदार्पण केल्लें. तशेंच 2007त दक्षीण आफ्रिकेंत जाल्ले संवसारीक टी-20 सर्तींत ताणें म्हत्वाची भुमिका वठयिल्ली.
फाटल्या 20 वर्सां पसून खेळत आसा. ह्या काळांत आपल्याक भारताचें आनी कर्नाटकाचें प्रतिनिधित्व करपाची संद मेळ्ळी. हाचो आपल्याक अभिमान दिसता. ह्या 20 वर्सांनी आपणेन साबार चड-उतार पळयले. पूण, दरेक गजालीची अखेर आसतातूच. त्या प्रमाण आपूण क्रिकेटीच्या सगल्या प्रकारांतल्यान निवृत्ती घेता. आपले संपुर्ण कारकिर्दींत आपल्याक तेंको दिवपी बीसीसीआयचे अध्यक्ष, कर्मचारी, पंगडांतले सहकारी, आपले प्रशिक्षक, आयपीएल पंगड तशेंच कर्नाटक क्रिकेट असोसिएशनाचो उपकारी आसा अशें ताणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
