भांगरभूंय | प्रतिनिधी
कांय वस्तू, गजालींचें म्हत्व कायम तिगून उरता. तातूंतलें एक रेशनकार्ड. आधारकार्ड येवन वर्सां उलगलीं तरी अजून ताणें आपलें म्हत्व, शेक कायम दवरला. आदारकार्ड आसतनाय कांय कामां खातीर आयजूय रेशनकार्डाची प्रत मागतात. मात, सवाय धान्य सोसायटीच्या मळार ह्या रेशनकार्डाक देंवती कळा लागल्या. नागरी पुरवण खात्यात पयरूच कितलीं रेशनकार्डां निलंबीत केल्यांत, ताचो आंकडोच जाहीर केला. वट्ट 82 हजार 240. तींय बी फक्त 18 दिसांनी. म्हयनो सोंपता म्हणसर हो आंकडो 1 लाखाचेर पावतलो. विचार करपा सारकी ही गजाल. पोरूं डिसेंबरांत खात्यान रेशनकार्डाचेर जांणी स म्हयने धान्य व्हरुंक ना, तांचीं कार्डां 1 फेब्रुवारीच्यान निलंबीत करतले, अशी घोशणा सरकारान केल्ली. तरीय नागरिक जागे जावंक नात. हीं 82 हजार कार्डां खरीं काय बोगस तेंय पळोवचें पडटलें. कारण, आमचे थळावे लोकप्रतिनिधी वीज- उदकाचें कनेक्शन आनी रेशनकार्ड दिवपांत खूब फिशाल. नागरी पुरवण खात्यान ते नदरेन तपास करपाक जाय. निलंबीत जाल्लें कार्ड परत मेळोवपाक तालुक्यांतल्या नागरी पुरवण अधिकाऱ्यांक स म्हयने धान्य कित्याक व्हरूंक ना, ताचीं कारणां दिवचीं पडटलीं. केव्हायसी दिवचो पडटलो. उपरांत खातें त्या रेशनकार्डाचो फुडार थारायतलें.
सगल्यांत चड रेशनकार्डां निलंबीत जाल्यांत तीं साश्टींत. 22 हजार 137. हाचें कारण थंयचीं बरींच कुटुंबां विदेशांत गेल्यांत. थोड्यांचीं अर्थिक परिस्थिती सुदारल्या. (तशी गोंयांत बरींच कुटुंबां गिरेस्त जाल्यांत. तीं करतात, त्या खर्चा वयल्यान हें जाणवता. अर्थांत थोडे हम भी कुछ कम नहीं हें दाखोवपाक रीण काडून सण मनयतात…. आनी मागीर त्रासांत पडटात!) बाजारांत नितळ धान्य, तेल, कड्डण सगलें कितें मेळटा म्हणटकच सवाय धान्य सोसायटींत सहसा कोण वचनात. 25, 30 वर्सां पयलीं सगले जाण चुकनासतना सोसायटींनी वताले. बरेच फावट तांकां भेसळ गंव, फांतर आशिल्ले तांदूळ मेळटाले. त्याच वेळार कांय खाजगी संस्थांनी, वेपाऱ्यांनी वेंचिल्लें धान्य दिवपाक सुरवात केली आनी ल्हवू ल्हवू करून सोसायट्यां पसून लोक तुटत गेले. अर्थांत सुदारिल्ली अर्थीक परिस्थितीय तितलीच जापसालदार आशिल्ली. रेशनकार्डाक सरकारी म्हत्व आसा. तें वचत जाल्यार निलंबीत रेशनकार्डांचो आंकडो दुपेट, तिपेट वाडटलो.
रेशनकार्डां उणीं जावप म्हणल्यार ताचो थेट परिणाम सोसायटकारांचेर जातलो. गिरायक ना जाल्यार ते कोटा उखलचे नात. मागीर तो गुदांवांतल्यान भायले भायर कर्नाटकांत पावपाचे गुन्यांवूय वाडटले. सगल्यांनी रेशन व्हरचें म्हूण नागरी पुरवण खात्यान हो रेशनकार्डां निलंबीत करपाचो उपाय केला. तो फळादीक जाता काय ना, तें फुडल्या 1- 2 म्हयन्यांनी कळटलें. ताचेच बरोबर सोसायटींतल्या म्हालाचो दर्जो आनीक सुदारपाक सरकारान पावलां उखलपाक जाय. वेगवेगळीं कडण्णां, तेलां आनी हेर जिनस सोसायटींनी विकूं येतात. हाॅर्टिकल्चराचे गाडे आसात, नाजाल्यार भाजी, फळांय आशिल्लीं. पूण, गिरायक आपूण जावन सोसायटींनी येवपाक जाय, हे खातीर आतां पावलां उबारचींच पडटलीं. एकेच फावटीन सगलो म्हाल मेळटलो हाचे कडेनूय लक्ष दिवचें पडटलें. सोसायटकार आनी गिरायकांकूय!
गुदांवांनी तांदूळ आयल्यार, गंव आयिल्ले नासतात. म्हणटकच सोसायटकारांक फावटी मारच्यो पडटात. मेळटा तें धान्य हाडल्यार येरादारीचेर चड दुडू खर्च करचो पडटा. म्हणटकच सगलो कोटा येता म्हणसर ते गुदांवांनी वचनात. रेशनकार्ड धारकांक 15 दीस धान्य मेळना, ताचे फाटलें कारण हेंच. हाचेर नागरी पुरवण खात्यान उपाय काडपाक जाय. धान्य नितळ आसतलें हेंय पळोवप तांची लागणूक. थळावे कर्मचारी नेमके कितें करतात, ताचेरुय लक्ष आसप गरजेचें. कारण, ट्रक सोसायटींनी वचपा बदला वाट चुकून कर्नाटकांत पावतात. हालींच सोसायटकारांनी आझाद मैदानाचेर आंदोलन केल्लें. कोरोना काळांत तांणी लोकांक धान्य दिल्लें, ताची थकबाकी सरकारा कडल्यान मेळूंक ना, अशें ते म्हणटाले. हो आनी तांचे हेर कांय प्रस्न आसात, जाल्यार ते सोडोवपाचो यत्न केन्ना जातलो? दळडीर रेशे सकयल (बीपीएल) आनी वयर (एपीएल) अशीं दोन रेशनकार्डां गिरायकांक दितात. तांची अर्थीक परिस्थिती तपासून हो निर्णय घेतात. मात, बीपीएल कार्डाचेर धान्य व्हरपी 7 लाखांची मोटार घेवन येतात. व्हेल्लें धान्य मागीर चड पयश्यांनी परप्रांतियांक विकतात. ताची चवकशी जावची. सवाय धान्य विक्री मळाचेर अशे साबार गैरप्रकार जातात, ते थांबयतलो जाल्यार रेशनकार्डां निलंबित करपा सारकेच हेर निर्णय घेवचे पडटले. भिवपाची गरज ना. नागरी पुरवण अधिकाऱ्यांनी मुखार सरचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
