रेवोड्यां पंचायतीच्या एमआरएफ शेडीक लागलो उजो
भांगरभूंय | प्रतिनिधी
म्हापशें, प्रतिनिधी ः रेवोड्यां ग्राम पंचायतीच्या एमआरएफ शेडीक आनी वाचनालयाचे कुडींक उजो लागून सुमार 3.50 लाखांचें लुकसाण जालें.
ही घडणूक शुक्रारा 3 तारखेर रातच्या सुमार 9.45 वरांचेर घडली. रेवोड्यां पंचायत घराच्या वाठारांत आशिल्ल्या एफआरएफ शेडींतल्या सुक्या कोयरांक पयली उजो लागलो. ते उपरांत रोखडोच उजो पातळ्ळो आनी शेजारच्या पंचायत कार्यालयांतल्या वाचनालयाच्या जनेला कडेन पावलो. मागीर भितरुय लागलो.
हातूंत वाचनालयांतलीं कांय पुस्तकां, टीव्ही सेट, शेडींचें पत्रे आनी विजेचीं उपकरणां लासलीं. उज्याक लागून सुमार साडेतीन लाख रुपया लुकसाण जालें.
म्हापशें उजो पालोवपी दळाचे परेश मांद्रेकार, गोविंद देसाय, गिरीश गावस आनी अशोक वळवयकार हांणी उजो नियंत्रणांत हाडलो. मजगतीं, उजो कसो लागलो हाचे कारण अजून कळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
