रेवोडेंच्या बीएनएफ रेसिडेन्सी इमारतीच्या फ्लॅटांत उजो
भांगरभूंय | प्रतिनिधी
सुमार 5 लाखांचें लुकसाण, दोगी तरणाट्यो किरकोळ जखमी
म्हापशेंः रेवोडेंच्या बीएनएफ रेसिडेन्सी इमारतीच्या तिसऱ्या माळये वयल्या फ्लॅटांत आयज सकाळीं सुमार 7 वरांचेर उजो लागलो. हातूंत 23 आनी 25 वर्सां पिरायेच्यो दोगी तरणाट्यो किरकोळ जखमी जाल्यो. उज्याक लागून जाल्ल्या धुंवरान तांकां स्वास घेवपाक त्रास जातालो. एअर-कंडिशनिंग युनिटांत जाल्ल्या शॉर्ट सर्किटाक लागून उजो लागला आसूं येता असो अदमास आसा.
उजो लागलो ते वेळार दोनूय चलयो कुडींत न्हिदिल्ली. सादूर शेजाऱ्यांनी दोनूय चलयांक सुरक्षीतपणान फ्लॅटांतल्यान भायर काडल्यो. ह्या वेळार एका थळाव्या नागरिकाकूय किरकोळ दुखापत जाल्या. दोनूय जखमी चलयांक म्हापशें जिल्हो हॉस्पिटलांत उपचारा खातीर व्हेल्यात.
कांचन आसुदली (23, मूळ बंगळूरू कर्नाटक) आनी प्रिया सेन (25, बिहार) अशीं जखमी जाल्ल्या तरणाट्यांची नांवा आसात. त्यो ह्या फ्लॅटांत बिराडाक रावताली.
म्हापशें उजो पालोवपी दळाचे जवान हवालदार विष्णू गावस, स्वप्नेश कळंगुटकार, प्रकाश घाडी, चंद्रकांत नायक आनी विष्णू केसरकार हांचेनी उजो नियंत्रणांत हाडलो. ह्या उज्यांत फ्लॅटातलें सामान लासून गोबर जालें. हाका लागून सुमार 5 लाखांचें लुकसाण जालां. कोलवाळे पुलिसांनी हे घडणुकेची दखल घेतली. पुलीस उपनिरिक्षक सनी काणेकार हांच्या फुडारपणा खाला तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
