भांगरभूंय | प्रतिनिधी
मध्य प्रदेशांत शिवराज चौहान सरकारान बायलांच्या बँक खात्यांत बाराशें कोटींची रक्कम जमा केल्ल्याची बातमी वाचली. अर्थांत राजकी पक्षांचो सत्ते खातीर खंयच्याय पांवड्यार वचपाचो कल पळयल्यार अजाप दिसलें ना. बायलांक म्हयन्याक एक हजार रुपये पोशण भत्त्याच्या रुपांत दिल्याच, त्या भायर फुडाराक ही रक्कम तीन हजारां मेरेन वाडोवपाचें आस्वासन दिवन भाजप सरकारान विधानसभा वेंचणुकेचे फाटभुंयेर काँग्रेशीची पुराय कोयंडी करून उडयल्या. कर्नाटकांत मतदारांक रेवड्यो वाट्टना काँग्रेस पक्षान फुडाराक ही धाम देशांत पातळटली, हाचो विचार करूंक नाशिल्लो. हेंच अस्त्र आतां काँग्रेसाचेर बूमरँग जावपाचीं चिन्नां दिसतात. पयर कर्नाटकांत बायलां खातीर मुफत बससेवा सुरू केली. मध्यप्रदेशांत काँग्रेशीन कर्नाटकांतलो कित्तो गिरयतना बायलांक दरेकी देड हजार रुपया भत्तो दिवपाचें आस्वासन प्रचारा वेळार दिलें आनी ताचे फॉर्म लेगीत भरून घेतले. मात शिवराज चौहान हांणी दोन पावलां मुखार वचून बायलांच्या खात्यांत एक- एक हजार रुपया जमा केले. काँग्रेशीच्या शहाक प्रतिशह दितले हाची अपेक्षा आशिल्लीच पूण मध्यप्रदेशांतल्या भाजपा सरकारान अशा निर्णयान विरोधकांक तांचेच भाशेंत जाप दिवन राज्यांतले अर्दे लोकसंख्येक आपले वटेन ओडून घेतल्या.
राजकी पक्षांच्या निशाण्यार सध्या चड करून बायलो आसात. स्त्री शक्तीक आपले वटेन हाडपाक जायतीं सरकारां येवजण्यो चालीक लावपाचेर भर दितात तें आमी फाटल्या कांय वर्सां सावन पळयत आयल्यात. गोयांत सर्गेस्त मुख्यमंत्री मनोहर पर्रीकार हांचे कारकिर्दींत लाडली लक्ष्मी, गृह आधार ह्यो कल्याणकारी येवजण्यो चालीय लायिल्ल्यो. बायल सशक्तीकरणाच्या नांवान ह्या ना त्या प्रकारान बायल शक्तीक राजकी फायद्या खातीर आपले वटेन घुंवडावप होच हेत ताच्या फाटल्यान आशिल्लो. उपरांत दिल्लींत केजरीवाल हांणी होच प्रयोग करून राजकी सुवार्थ सादून घेतलो. आतां देशांत ही धाम पातळत आसा आनी नियंत्रणांत येवचे बदला तिचें वट्ट स्वरूप चडूच गंभीर जायत वता हें कर्नाटक आनी मध्यप्रदेशांत सध्या जें चल्लां ताचे वयल्यान दिसता. कन्यादान येवजण, लाडली बहना येवजण, लाडली लक्ष्मी येवजण, बेकार भत्तो, मुफत वीज, उदक, 500 रुपयांत गॅस सिलिंडर अश्यो जायत्यो येवजण्यो सुरू आसून रेवड्यो वांटपाचें हें सत्र आतां थांबपाचीं कसलींच चिन्हां दिसनात. बायलांक सदांच दुय्यम दर्जो दिला, अश्यो आड्डी मारून ह्यो येवजण्यो सुरू करतना ताचे वायट परिणाम कसले जातले, हाचो मातूय विचार राज्यकर्ते करतना दिसनात हेंच हे रेवंडी संस्कृतीत अधोरेखीत केलां. मुख्यमंत्री शिवराज चौहान हांणी तर आतां लाडली भगिनी सेना उबारपाचें जाहीर करून सगल्यांक फाटीं उडयलां.
आतां मध्यप्रदेश, राजस्थान, छत्तीसगडांत विधानसभा वेंचणुको आसात. मतदारां खातीर रेवड्यो जाहीर करपाचे सर्तींत आपूण फाटीं तर पडचे नात मूं, असो विचार करून सगलेच येवजण्यो जाहीर करपाक लागल्यात. राजस्थानांतूय मुख्यमंत्री गेहलोत हांणी अश्या आस्वासनांच्यो हाचे पयलीं घोशणा केल्यात. वेंचणुको जिखप होच ताचे फाटलो हेत, हें सगल्याक कळटा, पूण वळना हेंच तर दुर्दैव. कर्नाटक वेंचणुकांत रेवड्यांची घोशणा राहुल गांधी हांणी विचार करनास्तना केली, मात ताचे परिणाम आयज सिद्धरामय्या सरकाराक भोगचे पडटात. वर्साक पन्नास हजार कोटींचें वाडटें चेंपण राज्याचे तिजोरीचेर पडटलें. ताका लागून उदरगतींच्या येवजण्यां खातीर कट्टी घेवन भोवचें तर पडचें ना मूं, अशें म्हणपाचो वेळ आयला.
रेवड्यो जाहीर करप आनी ताची पूर्तताय करप ह्यो दोन वेगळ्यो गजाली. आपल्या पक्षाचें सरकार सत्तेर येतलें कांय ना हाची खात्री नाशिल्ल्यान घडये ह्यो येवजण्यो राहुलान जाहीर केल्यो आसुये. मात आतां तांकां लागून ताचेर पश्चाताप करपाची पाळी आयल्या तरी तातूंतल्यान ते कितें शिकतले अशें दिसपा सारकी परिस्थिती ना. मध्यप्रदेश- राजस्थानांत सत्ता मेळोवपाक काँग्रेसान तोच मार्ग आपणायल्ल्या सारको दिसता आनी आतां भाजप लेगीत तेच वाटेन वता. आपल्यो येवजण्यो तितल्यो क्रांतिकारी अशें कांय राजकी पक्षांक दिसता आनी हेर पक्षांच्या येवजण्यो ह्यो रेवड्यो आशिल्ल्याचो समज करून दिवपाचो तांचो यत्न आसता. भाजपय हातूंत फाटीं आसा अशें म्हणपाक मेळचें ना. हो दिश्टिकोन पयलीं बदलपाची गरज आसाच, पूण त्याच वांगडा हाका लागून आमी देशाक नक्की खंय घेवन वतले हाचोय विचार करचो पडटलो.
रेवडी संस्कृतीचे खरे जनक कोण, ह्या प्रस्नाची जाप दितना आम आदमी पक्षाचे अरविंद केजरीवाल हांचें नांव प्रामुख्यान घेतात. तें चुकीचें आसा अशें म्हणपाक मेळचें ना. गोंयांतल्यान कांय प्रमाणात हाची सुरवात जाल्ली हें खरें आसलें आनी ताचो अतिरेक जालो तो दिल्लींत. केजरीवाल हांकां जाल्यार रेवडी संस्कृती होच पक्षाच्या येसाचो मंत्र दिसपाक लागलां आनी उपरांत पंजाबांत तांणी तोच प्रयोग येसस्वी करून सत्ता मेळयली. ताका लागून घडये रेवडी संस्कृती सगळे कडेन फुलत गेली आनी कर्नाटकांत काँग्रेसाक ताचो लाब जालो. ‘आप’न गोंयांत हो प्रयोग करून पळयलो, मात गोंयकार ताचे भकीक पडले नात, ही गजाल वेगळी. कर्नाटकांतल्या येसा उपरांत काँग्रेस पक्ष आतां हरियाणांत शंबर चौखण मिटराचो भूखंड फुकट दिवपाची भास करपाक लागला. हाचे वयल्यान सत्ते खातीर हे लोक देश विकपाक फाटी- फुडें पळोवचे नात, असो निश्कर्श कोणेय काडल्यार तो चुकीचो थारचो ना. रेवडी संस्कृती अशा घातक मोडणार पावल्या की थंयच्यान फाटीं सरप अशक्य थारलां. फुडल्या कांय वेंचणुकांचे फांटभुंयेर अश्या घोशणाचो घसघश्यान पावस पडपाक लागल्यार ताचें अजाप दिसचें ना. राज्यांच्या आनी पर्यायान देशाचे अर्थीक स्थिती खातीर रेवडी संस्कृती कितले मेरेन उपकारक थारता, हाचो दुबावूच आशिल्ल्यान फकत सत्ता मेळोवपा खातीर रेवड्यांचो पावस झडोवप हें खंय तरी बंद जावंक जाय. उठसूट रेवड्यो जाहीर करपी राजकी पक्षांक आतां लोकांनी जाप विचारपाचो वेळ आयला. पूण तशें जावचें ना. रेवडी संस्कृतीक आळाबंद घालप हें वेंचणूक आयोग वा न्यायालयाचे कक्षेंत येवपी ना तरी ताचो जो अतिरेक जातना आयज दिसता तें पळयल्यार हें सगळें खंय तरी थांबोवपाक जाय अशें साबार लोकांक दिसता. राजकी पक्षांकूय मतदारां प्रती आशिल्लो उदार दिश्टिकोन राज्यांची अर्थीक संतुळा इबाडची न्हय हे खातीर बदलचो पडटलो. तेन्नाच खंय तरी रेवड्यो जाहीर करपाची ही सर्त बंद जावपाची आस्त बाळगुपाक जाता…
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
